O videoxogo galego que axuda a previr depresións

Os resultados preliminares do estudo desenvolvido por un grupo de investigación da USC tamén identifican melloras no funcionamento social entre as persoas

Os resultados preliminares tamén apuntaron, ao remate da intervención, cara a un mellor funcionamento físico. Foto: Santi Alvite

O grupo de investigación en Saúde Mental e Psicopatoloxía (GRISAMP) da USC acaba de dar a coñecer na revista Games for Health Journal os primeiros resultados dunha intervención psicolóxica para previr a depresión e promover hábitos de vida saudables, así como dar pulo á estimulación cognitiva. Concretamente, avaliouse a eficacia preliminar dun videoxogo en liña, cunha aplicación complementaria. Os resultados amosaron unha mellor valoración persoal da saúde en referencia á saúde actual, as perspectivas de saúde no futuro e a resistencia a enfermar. A mostra empregada neste estudo piloto consistiu en 25 adultos maiores de 45 anos, o 64% mulleres, cunha idade media de 54,9 anos.

Os resultados preliminares tamén apuntaron, ao remate da intervención, cara a un mellor funcionamento físico, é dicir, grao en que a saúde limita actividades como o autocoidado, camiñar, subir escaleiras, inclinarse, coller ou levar pesos, e os esforzos moderados e intensos. O estudo tamén identificou melloras no funcionamento social ou grao en que os problemas de saúde interfiren na vida social habitual; e na saúde mental, en referencia a cuestións como a depresión, ansiedade, control da conducta e benestar xeral.

En canto á implicación no programa, a porcentaxe de adherencia foi moi alta, o número de módulos completados é de 7.5 sobre 8, e o número medio de tarefas completadas acadou case o 90%. “Os participantes amosaron unha elevada satisfacción e compromiso coa intervención”, apuntan dende o equipo liderado polo profesor da USC, Fernando Lino Vázquez. A intervención abrangueu oito módulos de 60 minutos de duración cada un, a razón dun por semana, con tarefas entre sesións para practicar as habilidades adestradas na súa vida real.

Adestrar a capacidade cognitiva

O tipo de videoxogo desenvolvido foi unha aventura gráfica baseada no Camiño de Santiago francés que se centra nunha personaxe protagonista (Jacobo) e integra o xogador/a nunha narrativa da que xorden interaccións con personaxes, elementos da contorna e crebacabezas, co obxectivo de adquirir ferramentas psicolóxicas e adestrar a súa capacidade cognitiva. O proxecto de investigación focaliza tres áreas: prevención da depresión, estimulación cognitiva e hábitos de vida saudable. O primeiro dos módulos presenta información sobre os síntomas depresivos e a necesidade do seu afrontamento activo, comezando pola auto-observación e rexistro do estado de ánimo e ensinando unha técnica de control da activacións (a respiración diafragmática profunda).

Os dous seguintes están orientados á activación condutual, mentres que do terceiro ao quinto introdúcese psico-educación sobre os hábitos de vida saudables (sono, actividade física e alimentación), así como estratexias para desenvolvelos. Nos módulos sexto e sétimo adéstrase os participantes na identificación de pensamentos negativos e en como cambialos por outros máis racionais e positivos. O último diríxese a fomentar a autoestima e a prevención de recaídas. A estimulación cognitiva e o adestramento en habilidades sociais son contidos transversais ao longo de todos os módulos do videoxogo.

Queres participar?

Na actualidade, o grupo GRISAMP está realizando un ensaio controlado e aleatorio para comparar a eficacia do videoxogo multimedia interactivo en liña, cunha aplicación complementaria, fronte a un programa tamén en liña sobre a promoción da saúde física e psicolóxica en adultos que se atopan na adultez intermedia ou etapas posteriores da vida. Os dous programas teñen unha duración e contidos similares. O recrutamento do proxecto segue aberto e, dende o grupo, fan chamamento ás persoas interesadas para participar. Os criterios son ter 45 anos ou máis, dispor dun ordenador e smartphone con internet; e non ter iniciado nos últimos dous meses un novo tratamento psicolóxico ou psicofarmacolóxico.

As persoas interesadas poden inscribirse e/ou resolver calquera dúbida ou cuestión escribindo ao correo electrónico gamapea.envejecimientoactivo@gmail.com ou chamando aos teléfonos 600 880 017 ou 673 528 166.

1 comentario

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.