A investigación que desenvolve o grupo liderado por José Martínez Costas no CiQUS da Universidade de Santiago de Compostela para obter unha vacina contra a Covid-19 continúa avanzando no procedemento. O equipo xa conseguiu dúas versións diferentes do seu preparado vacinal, e agora levarán a cabo as probas de seguridade, eficacia e resposta a anticorpos en ratos, no HZI de Alemaña. É o seguinte paso despois de realizar análises no Centro de Investigación en Sanidad Animal (CISA-INIA) de Madrid, co que cooperan neste proxecto, onde comprobaron que unha das versións era moito máis potente ca outra producindo anticorpos contra o SARS-CoV-2.
De saír segundo o previsto o ensaio en Alemaña, o seguinte paso será realizar os ensaios con macacos, en Holanda, no Centro de Investigación Biomédica sobre os Primates (BPRC). E posteriormente porán en marcha os trámites necesarios para comezar os ensaios clínicos en humanos.
Martínez Costas explica que no desenvolvemento de vacinas existe un número limitado de sistemas en todo o mundo, con pequenos aspectos que cambian duns a outros. Non obstante, o equipo da Universidade de Santiago emprega unha metodoloxía propia, que teñen patentada. “Podemos programar que células de calquera tipo constrúan microesferas de proteína e carguen dentro delas calquera proteína que nos interese, neste caso un antíxeno de coronavirus. Estas microesferas teñen capacidade para estimular o sistema inmune”, explica o investigador do CiQUS.
Doada de producir, barata e estable a temperatura ambiente
Tal como salienta Costas, este sistema de vacina presenta moitas vantaxes fronte a outras xa desenvoltas ou que se están a desenvolver. “A vantaxe principal da nosa vacina radica en que non se prevé que teña efectos secundarios adversos, xa que está composta só de proteína. Ademais, é máis completa que as que xa se están a aplicar. Nós usamos tres proteínas diferentes, é dicir, que a vacina está deseñada para facer fronte a varias proteínas do SARS-CoV-2 e contra varios tipos de resposta de anticorpos. Ademais, será moi doada de producir, moi barata e moi estable, podendo conservarse a temperatura ambiente sen que se alteren as súas propiedades”, apunta.
“Cantas máis vacinas haxa, moito mellor. Non sabemos se as primeiras que xa saíron ao mercado van ser as mellores. O que si está claro é que cantas máis maneiras haxa de atacar ao virus, máis esperanzador será o futuro. Os resultados que obteñan outros laboratorios non inflúen no noso traballo porque a nosa metodoloxía é diferente. Nós buscamos unha vacina segura e que funcione”.
Esta tecnoloxía desenvolvida pola USC ten moitas aplicacións, en particular a produción de vacinas contra calquera patóxeno. Xa a probaron con outros dous virus, o da lingua azul e o da peste equina africana, con bos resultados. E, en inmunoterapia de cancro en ratos, lograron retraer os tumores.
Para avanzar nestes preparados vacinais, o equipo traballou con mostras de pacientes afectados por coronavirus do Hospital Universitario Lucus Augusti de Lugo -Hula- para comprobar se as probas realizadas en ratos estaban ben feitas, se recoñecían os seus preparados vacinais contra o SARS-CoV-2, e os resultados obtidos foron moi alentadores.
Unha vez obtidos os resultados das probas en ratos en Alemaña, determinarase se a vacina funciona ben, o que marcará o seu futuro, de cara ao ensaio preclínico en macacos e finalmente o ensaio clínico en humanos.
Sumo Valor
O proxecto de Martínez Costas foi un dos dez que o Instituto de Salud Carlos III apoiou en España para obter unha vacina contra o coronavirus. Ademais, recibiu apoio da CRUE -Conferencia de Rectores de las Universidades Españolas-, do Banco Santander, do CSIC e da Comisión Europea -neste caso para a realización das probas preclínicas en animais-. Tamén obtiveron diverso financiamento privado, en particular unha xenerosa contribución da empresa Urovesa.
Pola súa parte, a USC, a través da plataforma de micromecenado Sumo Valor, ten aberta unha liña para realizar doazóns e apoiar a investigación. Esta iniciativa da Vicerreitoría de Planificación, Tecnoloxías e Sustentabilidade co apoio do Consello Social da USC, busca darlle máis visibilidade e aumentar a captación de fondos.
As achegas poden facerse mediante microdoazóns por valor non superior aos 3.000 euros, xa sexa unha cantidade monetaria ou un ben. As doazóns poden realizarse a través da páxina web do programa, nesta ligazón.
