O cancro de mama é dos máis diagnosticados no mundo e a principal causa de morte por tumores en mulleres. En 2022, rexistráronse 2,3 millóns de novos casos e 670.000 mortes a escala global, segundo un estudo liderado por Miranda Fidler-Benaoudia, investigadora nos Servizos de Saúde de Alberta, en Canadá. Os resultados, publicados na revista Nature Medicine, revelan que a carga da enfermidade está desigualmente distribuída: en países con índice de desenvolvemento humano (IDH) máis baixo, a mortalidade é significativamente maior.
Desigualdade
Os investigadores analizaron datos de incidencia e mortalidade de 185 países recollidos pola Axencia Internacional do Cancro e atoparon que o risco de diagnóstico de tumor de mama é máis alto en Francia (1 de cada 9 mulleres) e América do Norte (1 de cada 10), mentres que o risco de morrer pola enfermidade é máis elevado en Fiyi (1 de cada 24) e África (1 de cada 47).
Ademais, estudaron a evolución da mortalidade en 46 países durante 10 anos e concluíron que, aínda que diminuíu en 30 deles, só sete cumpren o obxectivo da OMS de reducir a mortalidade un 2,5% anual. Entre eles destacan Malta, Dinamarca e Bélxica. De manterse a tendencia actual, en 2050 rexistraranse 3,2 millóns de novos casos e 1,1 millóns de mortes por cancro de mama, cun impacto desproporcionado en países con menor desenvolvemento.
Os autores advirten que as súas estimacións están limitadas pola calidade e dispoñibilidade dos datos, especialmente en países con IDH máis baixo, onde os rexistros de cancro poden ser incompletos. A pesar diso, subliñan a necesidade de investimentos sostidos en prevención, detección precoz e acceso equitativo a tratamentos efectivos para frear o impacto do cancro de mama a nivel global.
Situación en España
Segundo a análise do xefe de servizo de Oncoloxía Médica do Hospital Gregorio Marañón, Miguel Martín, que non participou no estudo, a investigación “é a mellor aproximación posible á realidade”. Así o recolle o Sciencie Media Centre España, quen tamén consulta ao coodinador científico do Plan Nacional do Cancro, Josep M. Borrás. O experto matiza que os maior incremento da incidencia e da mortalidade darase nos países menos desenvolvidos. No caso de España, sinala que o estudo relaciona o incremento da incidencia en todos os grupos de idade cun descenso significativo no risco de morrer, algo en común cos países europeos da contorna.
“As recomendacións preventivas neste tumor son limitadas e o foco débese poñer no diagnóstico rápido e o cribado, así como na aplicación dos tratamentos eficaces a toda a poboación afectada polo tumor”, conclúe Borrás.
Referencia: Global patterns and trends in breast cancer incidence and mortality across 185 countries (Publicado en Nature Medicine)
