Nieves Cabo, de 82 anos, primeira vacinada en Galicia contra o coronavirus

A usuaria da residencia Porta do Camiño de Santiago inicia a campaña, para a que chegarán a Galicia este luns as primeiras 18.000 doses da vacina de Pfizer

Nieves Cabo Vidal, de 82 anos, converteuse hoxe na primeira persoa en recibir en Galicia a vacina contra a Covid-19. Esta usuaria da residencia Porta do Camiño, de Santiago de Compostela, recibiu a primeira dose as 11:00 horas de hoxe, 27 de decembro, día no que comeza  a campaña de vacinación en Galicia co antídoto de Pfizer. A propia Nieves asomouse ás xanelas da residencia para manifestar a súa ledicia e considerou que cuantos máis se vacinen mellor, ademais de constatar que “o bicho deu moitos desgustos”, segundo recolleu a axencia Efe.

As primeiras doses da vacina do coronavirus chegaron á dez da mañá ao almacén da empresa Biorepos, en Santiago de Compostela, que dispón do sistema de conxelación necesario para a súa conservación en frío, con temperaturas por baixo dos 70 graos baixo cero.

Publicidade

As doses chegaron dende Guadalaxara durante a noite nun convoi escoltado pola Garda Civil con apoio da Policía Nacional. O Sergas ten previsto vacinar un máximo de 250 persoas este domingo 27 de decembro.

Está previsto que a meirande parte das primeiras 18.000 doses cheguen este luns a Galicia na primeira entrega semanal do Goberno central. Pero non poderán utilizarse ese mesmo día, xa que deben ser baixadas a temperatura ambiente. Así que será o martes cando se realice a vacinación de xeito simultáneo en residencias das sete áreas sanitarias galegas.

Inicio da campaña de vacinación da Covid-19 na residencia de maiores Porta do Camiño, Santiago de Compostela.

O protocolo establecido fixa que os primeiros en recibir as vacinas serán os máis de 20.000 usuarios das residencias de maiores e os 17.000 traballadores destes centros. Tras eles, serán vacinados os 3.000 profesionais sanitarios que están directamente en contacto con pacientes do coronavirus.

Por outra banda, Araceli, unha muller de 96 anos, residente no centro de maiores Los Olmos de Guadalaxara capital, recibiu ás 9.00 horas a primeira dose da vacina en España.

Minutos despois foi vacinada Mónica, unha auxiliar de enfermería de 40 anos que traballa na mesma residencia. Con estas dúas inxeccións iniciouse este domingo en España a esperada estratexia de vacinación contra o coronavirus que se seguirá en todas as comunidades autónomas.

Está previsto que en doce semanas a inmunización chegue a 2.295.638 persoas a través de máis 4,5 millóns de doses da vacina de Pfizer e que se logre vacinar a toda a poboación durante varios meses.

Araceli, de 96 anos, residente en Guadalaxara, primeira vacinada en España.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Unha forte borrasca procedente de Groenlandia regará Galicia a partir do xoves

Unha masa de aire frío procedente do Atlántico norte provocará que as máximas caian por debaixo dos 20 graos en todo o territorio

Tes covid, alerxia ou catarro? Estas son as diferenzas

A inmunóloga e catedrática da UVigo África González sinala as diferenzas e similitudes dos síntomas que provocan as tres enfermidades

A primavera de 2024 en Galicia foi a terceira máis humida da serie histórica

A precipitación media das 16 estacións máis representativas foi un 67% superior ao habitual

Coidado coas alerxias: dispáranse os niveis de pole en toda Galicia

Pontevedra e Ourense rexistrarán os índices máis altos durante a semana, causados polas gramíneas e as altas temperaturas dos últimos días