Únete á nosa canle de Whatsapp
O Hospital Álvaro Cunqueiro de Vigo acolleu o primeiro nacemento dun bebé san dunha nai que dera positivo en coronavirus. A muller que deu a luz atópase estable, segundo fontes sanitarias.
En cambio, o bebé está ingresado na UCI de neonatos deste hospital vigués porque o peso era por baixo do establecido, xa que naceu na semana 35 de xestación. Os sanitarios confirmaron que o bebé deu negativo en Covid-19.
A nova rexistrada en Galicia é un fito importante dentro da pandemia do SARS-COV-2, xa que confirma as primeiras investigacións que apuntan a que este coronavirus non se transmite de nais a fillso durante a xestación. Ata o de agora, todos os estudos confirmaron que non se produce un paso do coronavirus ao feto, malia que a breve experiencia clínica cun patóxeno detectado hai menos dun ano impide ter certezas absolutas sobre este tema.
O estudo máis claro sobre un caso práctico foi publicado recentemente na revista Frontiers in Pedriatics. Catro bebés nados nun hospital de Wuhan, o epicentro do brote de coronavirus SARS-Cov-2, non amosaron signos de infección e seguen sans hoxe en día, segundo unha investigación de pediatras chineses. Con todo, sinalan que se necesitan máis estudos.
O traballo é o segundo que se realiza en China no último mes que confirma que as nais infectadas coa enfermidade coronavirus –coñecido como COVID-19– durante o embarazo non infectaron aos seus bebés.
Aquí podes ler o estudo en Frontiers in Pediatrics
