Unha das voces máis consultadas nas últimas semanas en Galicia para comprender a evolución da epidemia do coronavirus é Juan Gestal Otero, profesor emérito de Medicina Preventiva e Saúde Pública da USC. Gestal abordou este martes a situación pasada, presente e futura da crise desde o punto de vista da epidemioloxía no seminario organizado pola RAGC.
“O principal problema que tivemos foron os pacientes que xa eran infecciosos durante o período de incubación”, sinalou Gestal sobre unha das características que fixo máis grave e espallou a pandemia do novo coronavirus. “Os contaxios en fase presintomática foron moi importantes, aínda que o uso masivo de máscaras e os tests foron claves no éxito para deter o avance. Controlaron unha fonte de infección que se lle escapou a outros países”, engadiu o científico, que salientou o aprendido doutros abrochos previos como os do SARS e o MERS.
Outra das características do SARS-CoV-2 é que “a carga viral máxima aparece xusto antes do comezo dos síntomas, o que amosa o risco de contaxio nesta fase”, dixo Gestal, quen engadiu que “aos 21 días baixa ata o límite de detección sen diferenza por sexo, idade ou situacion clínica”.
Un dos maiores retos da ciencia neste intre é responder ao interrogante sobre os portadores despois da curación: “Eliminan o virus, ou queda en lugares do corpo onde non é detectado como podería ser o intestino?”
Sobre a fin das medidas de contención, Gestal cre que o “desescalado de verdade, para facer vida normal, con apertura de tendas e hostalaría, despois do pico de comezos de abril en Galicia” non está próximo: “Hai que chegar a que non haxa ningún caso, e telos controlados, ao que hai que engadir a capacidade de controlar calquera caso importado. En Wuhan, cando desapareceron os casos autóctonos, deixaron dúas semanas polas posibles incubacións antes de abrir”.
“Hai que ser prudentes, dixo Gestal, “o desconfinamento tense que facer distinguido por territorios dentro das comunidades autónomas, non poden saír todos á vez”.
O catedrático emérito da USC valora empregar test masivos, traballar cos colectivos máis expostos, facer rastrexos rigorosos de contactos, ou utilizar apps en móbiles para poder conter a pandemia.
No que atinxe a probabilidade de que no verán baixe a incidencia do virus, Gestal manifestou que o máis seguro é que “no outono teremos risco dunha nova ondada. Pero teremos máis recursos terapéuticos, con ensaios clínicos feitos con remdesivir ou con plasma. Mentres non teñamos unha vacina, non rematará esta situación, pero estaremos mellor porque temos aprendido moito nestes meses”.
E engadiu a súa perplexidade ante unha medida que se toma en moitas cidades e vilas: A desinfección das rúas; “non entendo por que se están a desinfectar as rúas, non lle atopo fundamento”.