Únete á nosa canle de Whatsapp
A Comisión de Saúde Pública do Ministerio de Sanidad aprobou este martes a revisión do documento que rexe a actuación ante a pandemia da Covid-19 en España: a estratexia de detección precoz, vixilancia e control. Un dos aspectos máis relevantes, ademais da introdución dos tests de detección do antíxeno do SARS-CoV-2 como ferramenta rápida de diagnóstico, é a redución a 10 días do período de illamento para as persoas que estiveron en contacto estreito cun positivo, segundo os criterios marcados por Sanidad.
Ata agora, indicábase vixilancia e corentena durante os 14 días posteriores ao último contacto co caso, polo risco de que o período de incubación e a capacidade infectiva do caso se prolongase alén deste tempo, aínda que a primeira proba PCR realizada puidera ser negativa debido a que se fixera nunha fase moi inicial da infección. A diminución do período de illamento está avalada pola evidencia científica dispoñible, e a medida xa estaba sendo aplicada nalgunha comunidade autónoma, como Navarra ou Cataluña. En Galicia, como no resto de España, cabía a posibilidade de que se reducise o illamento a 10 días no caso de facer unha segunda PCR que volvese ser negativa, aínda que non era habitual a realización desta segunda proba, e prolongábase o illamento ata as dúas semanas.
Por outra banda, para os casos leves, mantense o illamento de 10 días desde o inicio de síntomas, sempre que transcorresen polo menos tres sen presentar ningún síntoma. Se se dan estas circunstancias, non será necesario realizar unha proba diagnóstica nin para levantar o devandito illamento nin para reincorporarse á actividade laboral.
Nos casos asintomáticos que resulten positivos, o illamento manterase en 10 días desde a data de toma da mostra para o diagnóstico. O seguimento será supervisado ata a alta epidemiolóxica da forma na que o estableza cada comunidade autónoma.
La Ponencia de Alertas y Planes de Preparación y Respuesta y la Comisión de Salud Pública han revisado la “Estrategia de detección precoz, vigilancia y control de la #COVID19” que incluye acortar el período de #cuarentena para contactos estrechos a 10 días pic.twitter.com/E1HKm7bZd8
— Ministerio de Sanidad (@sanidadgob) September 22, 2020
No ámbito laboral, o persoal sanitario e sociosanitario que resulte ser un caso confirmado e non requira ingreso hospitalario, seguirá as mesmas pautas que a poboación xeral en canto ao illamento. Estes traballadores poderanse reincorporar ao seu posto de traballo aos 10 días do inicio de síntomas sempre que permanezan asintomáticos polo menos os últimos 3 días, e tras a realización dunha proba de diagnóstico que indique que superaron o período de transmisibilidade da infección.
Aos contactos estreitos, indícaselles vixilancia e corentena durante os 10 días posteriores ao último contacto cun caso confirmado. Así mesmo, dependendo da situación epidemiolóxica de cada comunidade autónoma, poderase recomendar a realización dunha proba diagnóstica durante o período de corentena.
