O hospital de Santiago recibe un premio á mellor publicación pediátrica do ano

O servizo de Pediatría do Hospital Clínico de Santiago acaba de recibir no congreso anual da Sociedade Europea de Enfermidades Infecciosas Pediátricas (ESPID) o premio á mellor publicación do ano na revista The Pediatric Infectious Disease Journal. A investigación dirixida por Federico Martinón Torres, xefe do servizo, afondaba no estudo da duración da protección da vacina fronte ao neumococo en bebés prematuros.

“Este premio é un estímulo máis para o noso servizo”, destacou o xefe de Pediatría do hospital de Santiago

Martinón, tamén responsable do grupo de investigación en vacinas e ensaios clínicos do Instituto de Investigación Sanitaria de Santiago (IDIS) recibiu o galardón no evento celebrado en Malmö (Suecia) e impartiu unha charla sobre o estudo premiado. “Este premio é un estímulo máis para o noso servizo e reforza o lema do Hospital Clínico de Santiago no que a excelencia asistencial vai da man da excelencia investigadora”.

O traballo avaliaba apersistencia da resposta de anticorpos ao ciclo de catro doses recomendado da vacina antineumocócica conxugada 13-valente (a mesma que se utiliza no calendario español) nos recentemente nados prematuros, en comparación cos recentemente nacidos a termo. Segundo explica o doutor Martinón, cómpre sinalar “a importancia da natureza multicéntrica do estudo” e como, deste xeito, a “investigación clínica non só beneficia aos pacientes do centro en que son atendidos, senón que ademais permite, a través da publicación dos resultados, que calquera poida beneficiarse dos avances obtidos”

Os resultados

Na súa investigación, os científicos galegos atoparon que as respostas inmunes persistiron ata dous anos despois de completar a pauta vacinal con 3 doses nos primeiros 6 meses de vida e un reforzo aos 12 meses de idade coa vacina conxugada 13-valente. Os achados teñen implicacións importantes para reducir o risco elevado de enfermidade neumocócica invasiva en recentemente nados prematuros.

Deste xeito, os autores puideron concluír que “o programa de vacinación de rutina (3 + 1) probablemente ofreza protección a longo prazo contra a enfermidade neumocócica invasiva en recentemente nados prematuros e debe iniciarse, independentemente da idade de xestación ou do peso ao nacer, completándoa sen atrasos ao ano de vida”.

Federico Martinón intervén despois de recibir o premio en Malmö (Suecia).
Federico Martinón intervén despois de recibir o premio en Malmö (Suecia).

O autor principal do traballo sinala que “a diferenza dos recentemente nacidos a termo, os prematuros deben recibir catro doses e non só tres, tal como se desprende do devandito estudo, para garantir a mellor protección”.

O editor xefe de The Pediatric Infectious Disease Journal, Steven Black, gabou tamén a investigación desenvolvida polo equipo galego: “Estes achados subliñan a importancia das recomendacións actuais da vacinación antineumocócica para maximizar a protección contra a enfermidade neumocócica invasiva en recentemente nados prematuros de alto risco”.

O Premio ESPID-PIDJ, creado este año, recoñece o mellor traballo de investigación orixinal presentado á revista por un membro de ESPID durante o ano anterior, segundo o determinado polo Comité de Premios ESPID. Adam Finn, presidente de ESPID, afirmou, segundo recolleu o Sergas: “O obxectivo deste novo premio é destacar a asociación entre ESPID e PIDJ, e recoñecer a excelencia do traballo científico que realizan os membros de ESPID”.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.