A Dirección Xeral de Saúde Pública emitiu este venres o seu informe semanal de actividade gripal, como adoita facer durante a campaña, e no momento no que se achega a onda epidémica da doenza. Aínda que as cifras están moi por debaixo da incidencia de anos anteriores (o ano pasado houbo 200 falecidos diagnosticados), producíronse xa os primeiros dous falecementos, segundo recolle o Sergas. Un deles foi a causa do propio virus, engadido a outras complicacións de saúde, mentres que no outro caso produciuse debido a outros problemas, aínda que a persoa tamén estaba diagnosticada de gripe.
Desde o comezo da tempada ata o mércores 16 producíronse 152 ingresos, e 69 deles xa foron dados de alta. Do total dos casos, 17 requiriron asistencia na UCI e dos 136 ingresados que tiñan indicada a vacina por pertencer a algún dos colectivos de risco, 86 non a recibiran.
Desde os servizos sanitarios realízase tamén a vixilancia microbiolóxica do virus. Nesta semana pasada tomáronse 518 mostras, das que 66 foron positivas para o virus da gripe A, e 1 para o virus da gripe B, “o que se traduce, tendo en conta os niveis provinciais da intensidade da actividade gripal, nunha difusión xeográfica local”, segundo o informe.
Ante a situación de onda epidémica, o Sergas informou de que mantén plans de continxencia para atender o incremento da demanda asistencial e os aumentos de ingresos. Porén, o conflito que atravesa a sanidade pública debido á precariedade laboral e as folgas en servizos de urxencias, como o do CHUS, ou nos PAC de toda Galicia poderían complicar a situación, pois xa se están xerando problemas con moitas horas de espera en hospitais como o Álvaro Cunqueiro de Vigo.