Un estudo da Universidade de Santiago (USC) constata que Galicia é a quinta comunidade autónoma con maior prevalencia de obesidade. A investigación, centrada no período 1987 e 2020, calculou que a porcentaxe de homes obesos aumentou dun 5,4% a un 17%; mentres que a de mulleres pasou dun 6,8% a un 16,2%. “Galicia ten un índice de avellentamento moi alto, o que podería estar detrás destas altas taxas de obesidade”, explica Julia Rey, coautora do estudo e investigadora na área de Medicina Preventiva e Saúde Pública da USC. Malia as cifras, o estudo conclúe que Galicia tende á estabilización, dado que nos últimos anos non se produciu un “aumento tan marcado” no número de persoas con obesidade.

O estudo, publicado na Revista Española de Cardiología, analizou as prevalencias de obesidade de toda España. O maior aumento observouse nos grupos de idade máis novos, tanto en homes como en mulleres. Na última década detectouse unha estabilización nas prevalencias, que aparece antes nas mulleres. Desde 2003, o predominio de obesidade é similar en ambos os sexos, tal e como amosa o estudo. En 2020, a prevalencia de obesidade estimouse no 16% e demostrouse que esta prevalencia aumenta coa idade. Así, en 2020, o 4% das persoas de 15 a 24 anos eran obesos fronte ao 21% dos de 65 anos e máis.

Publicidade

Diferenzas entre comunidades

Existen diferenzas nas prevalencias de obesidade entre as comunidades autónomas, sendo as do noroeste e as do sur as que presentan as prevalencias de obesidade máis elevadas. Así en 2020, Andalucía, Rexión de Murcia, Canarias, Castela e León, Galicia e Principado de Asturias foron as comunidades con maiores prevalencias de obesidade; fronte á Comunidade de Madrid, Comunidade Foral de Navarra ou País Vasco, que son as que presentaron unha menor prevalencia. Diferenciando por xénero, en 2020, Andalucía e Principado de Asturias foron os territorios con maior prevalencia de obesidade en homes, e Andalucía e Rexión de Murcia, en mulleres.

“Aínda que a prevalencia de obesidade se estabilizou en España, isto non é homoxéneo en todas as súas comunidades autónomas”, sinalan dende o equipo responsable da investigación. Na Comunidade Valenciana detéctase un aumento continuo das prevalencias en homes. Nas mulleres, a prevalencia mostra un aumento continuo en Andalucía, Principado de Asturias, Cataluña e A Rioxa; unha tendencia crecente e posteriormente decrecente en Valenciana e Estremadura e unha estabilización no resto de Autonomías.

“A obesidade constitúe un importante problema con repercusións para a saúde cardiovascular e cun impacto negativo noutras enfermidades crónicas”, sinalan. Á luz das conclusións do estudo, constátase a necesidade de “continuar desenvolvendo intervencións preventivas orientadas a reducir o exceso de peso dende idades temperás”, tendo en conta o xénero e as particularidades de cada comunidade autónoma.

Referencia: Prevalencia de la obesidad en España y en sus comunidades autónomas, 1987-2020 (Publicado en Revista Española de Cardiología)