Únete á nosa canle de Whatsapp
Os casos de varíola do mono, unha enfermidade endémica de África occidental e central, seguen a aumentar nunha vintena de países. España xa conta con 59 casos confirmados, segundo os últimos datos ofrecidos polo Ministerio de Sanidade. Galicia, de momento, conta con tres sospeitosos. En atención á situación epidemiolóxica, a ministra Carolina Darias, anunciou onte que España adquirirá doses da vacina INVANEX, empregada contra a varíola, así como o fármaco Tecovirimat, un tratamento antiviral. O proceso de merca será conxunto e estará liderado pola Autoridade de Preparación e Resposta ante Emerxencias Sanitarias da Unión Europea (HERA).
Secuenciación do virus
As declaracións de Darias foron realizadas na rolda de prensa posterior á celebración do pleno extraordinario do Consello Interterritorial do Sistema Nacional de Saúde (CISNS), onde estivo acompañada polo director do Instituto Nacional de Salud Carlos III (ISCIII), Cristóbal Belda. Este último confirmou que se logrou a secuenciación ao 100% do virus da varíola do mono. Isto permite confirmar que a variedade de casos coincide co clado África occidental, a máis leve das coñecidas.
Os casos coinciden co clado de África occidental, o máis leve dos coñecidos
Amais disto, Belda explicou que a secuenciación acadou unha cobertura do 100% dos 190.000 pares de bases do xenoma do virus; algo que abre a posibilidade de estudos filoxenéticos máis avanzados e que permitirán obter información adicional sobre o seu comportamento e comprender mellor a súa orixe, circulación e difusión. O director do ISCIII tamén indiciou que é a primeira vez en Europa que se logra realizar a secuenciación completa do virus en mostras procedentes de 23 pacientes.
Situación epidemiolóxica
En relación á situación epidemiolóxica, o ISCIII analizou mostras pertencentes a 100 casos. Deles, confirmáronse 59 casos positivos a orthopoxvirus e outros 41 casos deron negativo para varíola humana e para outros orthopoxvirus, por tanto, descártanse. Ningunha das persoas afectadas requiriu hospitalización e a enfermidade cursou de maneira leve en todos eles.
No que respecta á situación mundial, segundo os últimos datos ofrecidos polo Centro Europeo para a Prevención e o Control de Enfermidades (ECDC) xa hai 219 casos confirmados en todo o mundo, a maioría deles en homes novos. En canto á Unión Europea, o número total de casos ascende a 118.
“De ningunha maneira debemos vacinar a poboación xeral contra a varíola do mono”
