Un proxecto galego integrado por un equipo multidisciplinar investiga o desenvolvemento dun sistema de detección de covid-19 a partir de técnicas moleculares e integrando a nanotecnoloxía e microfluídica coa automatización. Baixo o nome de Detección rápida e automatizable para SARS-Cov-2 baseada en PCR, nanotecnoloxía e microfluídica (Nanofluidetec) perséguese un dispositivo eficaz, compatible con métodos de diagnóstico de baixo custo e flexible para aumentar a capacidade de resposta diagnóstica en futuras pandemias ou enfermidades comúns.
A iniciativa pretende, por tanto, a mellora dos actuais sistemas de detección baseados en PCR, tanto en rapidez como en fiabilidade. O dispositivo final estaría pensado para o seu uso en centros de atención primaria, asistenciais ou residencias. Point-of-care-testing (POCT) é un tipo de probas diagnósticas que ofrecen un resultado en poucos minutos, sen necesidade de enviar a mostra a un laboratorio. É unha tecnoloxía similar á dos sistemas domésticos para controlar a glicosa que empregan as persoas diabéticas nos seus domicilios.
O proxecto
O proxecto Nanofluidetec está baseado en desenvolvementos científicos anteriores
e actuais do consorcio para obter un sistema que permita a detección do material xenético do SARS-CoV-2 en individuos sospeitosos de covid-19, de modo que se pretende miniaturizar, automatizar e simplificar o tedioso proceso de extracción do virus. Para iso integraranse as áreas de xenética, nanotecnoloxía, microelectrónica, fotónica, biotecnoloxía, fabricación e procesamento avanzado e o seu tratamento e operatividade a través das tecnoloxías da información e a comunicación (TIC).
A investigación pretende pretende miniaturizar, automatizar e simplificar o tedioso proceso de extracción do virus
Esta iniciativa innovadora está impulsada por tres compañías galegas e un centro público de investigación: AMSlab, laboratorio lucense líder en control de calidade de diferentes sectores e especialista no desenvolvemento de métodos analíticos innovadores; AMSbiopharma, que ofrece solucións analíticas a compañías da industria química, farmacéutica e biofarmacéutica con sede en Lugo e pertencente ao grupo AMSlab; BFlow, situada en Santiago de Compostela e especializada en solucións integrais de microfluídica e chips para a industria biotech, e o Campus de Lugo da Universidade de Santiago de Compostela a través da unidade de investigación de Fluorescencia de Moléculas Individuais.
Programa Conecta Covid
Nanofluidetec está subvencionado pola Axencia Galega de Innovación (GAIN), financiado con cargo aos Fondos FEDER e conta co apoio da Xunta de Galicia a través da Vicepresidencia Segunda e Consellería de Economía, Empresa e Innovación, que dirixe Francisco Conde. A iniciativa empresarial está financiada a través do programa CONECTA COVID 2021 no marco do eixo REACT-UE do programa operativo Feder Galicia 2014-2020, como resposta da Unión Europea á pandemia da COVID-19.