Este verán, poderase visitar a capital das Rías Baixas de xeito virtual. Así, as persoas interesadas poderán facer turismo dende a súa casa. O visitante poderá coñecer unha cidade de arte e de historia. Será posible camiñar polo segundo centro histórico máis importante de Galicia, tras o de Santiago de Compostela. Esta forma de viaxar achegará a cidade de Pontevedra a moitos lugares do mundo.
Pontevedra é, segundo ONU, unha das cidades máis cómodas para vivir pola súa calidade urbana, mobilidade e accesibilidade. O seu modelo urbano esperta o interese de países como Francia ou mesmo China. É, pois, un referente a nivel internacional. A través desta visita cibernética, desfrutarase de lugares simbólicos da cidade como a Igrexa da Peregrina, o Papagaio Ravachol ou As pontes, que representan a esencia de Pontevedra.
