Únete á nosa canle de Whatsapp
O Ministerio de Sanidade español descartou no mediodía deste venres que tres persoas que foron estudadas tras chegar ao país procedentes da cidade chinesa de Wuhan padezan o coronavirus que se está a espallar pola provincia de Hubei.
Segundo informou a administración nunha nota de prensa, realizouse unha actuación sanitaria despois de que o servizo de Sanidade Exterior, dependente do ministerio, fose avisado da sospeita dun posible caso nunha muller que chegou a Barcelona desde China con escala en Ámsterdam. Ademais, valoráronse outras dúas persoas procedentes de Wuhan que chegaron a España. Nun dos casos activouse a alerta, aínda que as análises descartaron a doenza, e no outro caso nin sequera se chegou a activar o protocolo.
Última hora sobre el coronavirus. Los casos en estudio han dado negativo, tal y como se explica en la nota de la última actualización del CCAES, publicada en la página web del Ministerio de @sanidadgob:https://t.co/SyfKUAE3Rp
— Ministerio de Sanidad (@sanidadgob) January 24, 2020
O Goberno español non se expón polo momento tomar ningunha medida excepcional nos aeroportos, xa que non hai voos directos desde Wuhan, que tampouco é un destino turístico habitual desde España, e é unha medida “que non ten demostrado eficacia”, segundo Simón. Só os países que teñen conexión directa están a tomar algún tipo de protocolo deste tipo.
Con todo, as autoridades sanitarias non descartan que apareza algún caso importado en España, pero a probabilidade segue sendo baixa, xa que os datos dos que se dispón ata o de agora apuntan a que a transmisión do coronavirus persoa a persoa non é elevada.
O coronavirus de Wuhan
Os coronavirus son unha ampla familia de virus que adoitan afectar só a animais, aínda que ás veces poden transmitirse a seres humanos. Os seus síntomas van desde os arrefriados leves ata doenzas máis graves, como é o caso da síndrome respiratoria aguda grave (SRAS-CoV), ou o coronavirus causante da síndrome respiratoria de Oriente Medio (MERS-CoV).
A doenza detectouse na cidade chinesa de Wuhan, na provincia de Hubei, en decembro do pasado ano. As últimas estimacións falan de preto de 30 mortos e 900 afectados. A situación levou ao goberno e ás autoridades sanitarias da China a decretar unha corentena que afecta a 40 millóns de persoas en Wuhan e os seus arredores, coincidindo coa celebración do Aninovo chinés, un momento que supón un dos maiores movementos de persoas que teñen lugar actualmente no planeta.
En España elaborouse un protocolo de actuación ante a aparición de posibles casos, que inclúe medidas para a detección temperá, a vixilancia epidemiolóxica, a prevención da transmisión persoa a persoa e o seguimento de contactos dos posibles contaxiados.
Aquí tes máis detalles:
