Venres 23 Febreiro 2024

As augas residuais de Santiago revelan menor consumo de cocaína pero un rápido aumento de MDMA

A capital galega tamén está no top 20 de cidades europeas auditadas que máis cannabis consomen

Santiago reduce o consumo de cocaína pero experimenta un rápido crecemento do MDMA. Esa é a conclusión que se extrae do último informe do Observatorio Europeo das Drogas e das Toxicomanías (EMCDDA, polas súas siglas en inglés). O documento, que se deu a coñecer este mércores, recolle a análise diaria de augas residuais de 104 cidades europeas de 21 países. O seu obxectivo é avaliar o consumo de seis substancias: cocaína, MDMA, cannabis, metanfetaminas, anfetaminas e ketamina. Segundo os resultados, as tres primeiras son as que máis se consomen en Santiago.

Máis polo miúdo, a cocaína constata a súa tendencia de descenso na capital galega. Despois de varios anos integrando o top 20 de cidades nas que máis se consumía esta substancia, Santiago consegue saír da lista en 2022. De feito, tamén é a zona urbana de todas as analizadas de España —Tarragona, Lleida, Valencia, Barcelona e Castellón— na que menos cocaína se consome.

De todas formas, a media diaria é de 505,1 miligramos por cada 1.000 habitantes, moi por enriba da cifra que se rexistraba en 2011 (211,22), ano no que se comezou a elaborar o informe. Aínda así, dende 2020 experimentouse un lixeiro descenso. O ano da pandemia notificaba unha media diaria de 610,70 e xa comezaba a baixar en 2021 (546,97). Amais diso, os gráficos mostran un consumo de cocaína claramente asociado coa fin de semana, dado que o sábado, domingo e venres son os días nos que máis se consome.

A substancia que experimenta un aumento do seu consumo en Santiago, en comparación cos anos anteriores, é o MDMA. De feito, a capital galega está no top 20 das cidades europeas que máis consomen esta substancia. Aínda así, Santiago (30,41) está lonxe de Ámsterdam (182,32), que lidera a lista. Os datos elevados constátanse en España, converténdose na segunda cidade na que máis se consome MDMA, só por detrás de Barcelona (45,53).

De feito, estes datos veñen avalados por un rápido crecemento do seu consumo nos últimos anos. Mentres que en 2011 a media diaria era de 5,99, dende 2019 experiméntase un rápido aumento. A repunta constatouse en 2020 (29,64), reduciuse en 2021 (17.78) e volveu subir en 2022. De igual modo que acontece coa cocaína, os domingos, sábados e venres son os días nos que máis se consome, rexistrando un forte descenso o resto da semana.

En relación ao cannabis, Santiago volve estar no top 20 das cidades que máis o consomen, ostentando o posto número 15 cunha media diaria de 92,81. En España tamén está entre as que máis consomen esta substancia, só por detrás de Barcelona (151,1) e Valencia (93,94). Respecto ao 2011, non se rexistran cambios moi significativos. No primeiro ano de elaboración do informe detectárase unha media de 78,79, sendo o seu pico máis baixo en 2013 (56,72). O maior consumo rexistrouse en 2019 (120,06) e foi decaendo ata o 2022, ano en que volve repuntar. Curiosamente, rompe a tendencia das anteriores substancias e o martes é o día da semana no que máis se conmome, seguido do venres e do sábado.

As outras tres drogas analizadas son as metanfetaminas, as anfetaminas e a ketamina. Desta última non se obtiveron datos, sendo este ano o primeiro que se inclúe na nómina de drogas a analizar. Chama a atención a metanfetamina, cunha media de 1,56 que non se detectara ata este ano. As anfetaminas, pola contra, experimentaron un forte descenso dende 2011, cunha media de 33,84, que se ve reducida ata o 8,35 de 2022.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un equipo galego participará na creación de alimentos a partir de augas depuradas

Un proxecto europeo desenvolverá un sistema acuapónico que combina a acuicultura tradicional co cultivo de plantas en augas rexeneradas

Un investigador galego demostra que a psicoloxía inflúe na reutilización de augas residuais

O subconsciente da cidadanía incide no proceso de decisión para escoller esta solución tecnolóxica fronte a escaseza de auga

Minidepuradoras especializadas: a proposta galega fronte aos contaminantes emerxentes

O proxecto Presage, no que participa a USC, proba en Porto do Molle plantas máis pequenas e económicas que aproveitan o potencial enerxético das augas negras

Analizan o vínculo entre contaminantes químicos e posibles enfermidades durante o embarazo

Un estudo de científicos cataláns identifica 42 compostos químicos potencialmente nocivos, que poderían causar enfermidades ou cambios no metabolismo