O Proxecto Xenoma Galicia arrinca a súa andaina cun claro obxectivo: anticiparse ás enfermidades. Esta iniciativa, que prevé recompilar o ADN de 400.000 galegos para identificar variantes xenéticas de alto risco, é considerada por Ángel Carracedo como “a máis ambiciosa do mundo”. Así o declarou esta mañá o director da Fundación Pública de Medicina Xenómica de Galicia durante a presentación oficial do proxecto. “É unha oportunidade para as futuras xeracións. Vai crear riqueza tanto no ámbito biotecnolóxico como farmacéutico, e vai beneficiar directamente os cidadáns con cribados. Pero, sobre todo, permitirá que nos anticipemos ás enfermidades”, declarou Carracedo.
O proxecto, que conta cun orzamento de 20 millóns de euros, está dirixido a persoas de entre 35 e 65 anos que serán escollidas de forma aleatoria. De feito, o pistoletazo de saída da iniciativa será o envío dun millar de invitacións co obxectivo de que nos primeiros seis meses de 2024 xa se teñan as primeiras mostras. Na presentación do proxecto, á que tamén acudiron o conselleiro de Sanidade, Julio García Comesaña, a coordinadora da iniciativa, María Brión, e outros expertos, confirmouse que se prevé ter as mostras de 400.000 galegos —arredor do 15% da poboación— nun prazo de 5 anos. A este respecto, Carracedo apelou á participación: “Imos necesitar o apoio de todos e a xenerosidade dos galegos, da que non dubido, porque sempre fomos un pobo xeneroso co futuro da ciencia”.
O proxecto centrarase na creación dun banco con datos xenéticos, a creación dun biobanco de mostras biolóxicas, e tamén a realización de cribados xenéticos que, nesta primeira fase, centrarase en buscar alteracións asociadas ao cancro de mama e ovario hereditario, a síndrome de Lynch e a hipercolesterolemia familiar. No que respecta aos participantes, terán que recoller unha mostra de saliva e despositala nos contedores habilitados no seu centro de saúde. A información que se extraia será fundamental para a historia clínica do paciente, pero tamén para coñecer o perfil xenético da comunidade.
Ademais, 100.000 destes 400.000 seleccionados serán convidados a participar cunha mostra de sangre —que se recollerá tamén no seu centro de saúde— nun biobanco de mostras de sangue, plasma e soro que servirá para a investigación, para desenvolver fármacos máis adaptados ás características xenéticas galegas, e que permitirá a Galicia tomar parte en ensaios a nivel nacional e internacional. “No futuro próximo, este proxecto vai ter un beneficio moi importante para entender a enfermidade e a saúde a nivel global”, sostivo Carracedo no acto celebrado esta mañá
Durante presentación tamén se deron a coñecer os nomes dos membros dos comités que asesorarán e acompañarán o desenvolvemento do Proxecto Xenoma Galicia. Segundo explicaron no acto, a iniciativa tamén implicará as universidades galegas, os institutos e centros de investigación, así como ao tecido económico do ámbito biotecnolóxico de Galicia. Nesta liña, remarcaron que o Proxecto Xenoma Galicia contará co acompañamento e asesoramento de ata catro comités: un institucional, un de tipo funcional, ademais de cadanseu comité científico de carácter interno e externo.
Máis sentido común (lóxica natural) e menos ‘investigacións’ ou implantacións de IA. O mellor xeito de anticiparse as enfermidades é poder ter unha vida libre de toxicidade: unha alimentación totalmente natural (dígase ecolóxica), unha atmósfera limpa, libre de tóxicos químicos e físicos e unha vida digna con tempos pra desfrutar e cuidarse, e non esta, ó servizo do capitalismo, que nos están impoñendo case sen darnos conta.
Colaborar en estudios de xenoma