Únete á nosa canle de Whatsapp
Unha revisión científica de artigos publicados nos últimos 20 anos, desenvolvida por científicos de varias instucións españolas e publicada na Revista Española de Salud Pública, conclúe que non hai evidencias de que o consumo de diferentes bebidas alcohólicas teña un efecto diferencial na aparición e desenvolvemento de enfermidades cardiometabólicas, neurodegenerativas ou cancro. É dicir, non hai probas de que ‘recomendar’ unha ou outra bebida alcohólica poida relacionarse con menor risco ou beneficios para a saúde. Neste sentido, o traballo, cuxo primeiro asinante é Iñaki Galán, investigador do Centro Nacional de Epidemioloxía do Instituto de Saúde Carlos III, insiste en que a mellor recomendación é o consumo cero de alcol, segundo recolle a Axencia SINC.
Tal e como explica Galán, hai certa tendencia social a crer que algúns tipos de bebidas alcohólicas poderían achegar, dentro dos comprobados efectos negativos globais que ten o consumo de alcol, algún efecto beneficioso (por exemplo, en ocasións cítanse os polifenois do viño).
“O mellor, en cuestións de seguridade para a saúde, é non consumilo”, di Iñaki Galán
“Galán pide prudencia fronte ás as mensaxes que fomentan o consumo moderado de alcol. “O mellor, en cuestións de seguridade para a saúde, é non consumilo”, aconsella. “Pero, se as persoas toman alcol, a recomendación é non exceder certos limiares (non chegar a 20 g/día en homes e 10 en mulleres)”. Os resultados sinalan que non é posible recomendar unha ou outra bebida alcohólica para manexar estes limiares ou un consumo moderado’. Entre algúns dos datos que expón a análise, destácase que o consumo de alcol é responsable dun 7,6% das mortes en España.
O estudo realizouse mediante unha procura a través de PubMed (entre xaneiro de 2000 e febreiro de 2019) de revisións sistemáticas e metaanálisis que reportaban resultados cuantitativos da asociación entre o consumo de diferentes tipos de bebidas alcohólicas e efectos en saúde. Os autores traballaron con 26 estudos: 21 relacionados con cancro, 3 con enfermidades cardiometabólicas, 2 con neurodexenerativas e un con mortalidade xeral.
Sen diferenzas entre bebidas
A investigación revela que non hai consumo positivo de alcol para a saúde e confirma que tomar unha ou outra bebida alcohólica (viño, cervexa, licores ou combinados) non inflúe en posibles resultados de saúde ou no risco de enfermidade ou morte.
Os datos foron heteroxéneos, de aí a imposibilidade de extraer datos diferenciais entre bebidas alcohólicas. Determinadas variables (diferenzas metodolóxicas na estimación da inxesta de alcol, control de efectos de confusión e contraste das estimacións entre o tipo de bebidas) fixeron moi difícil sacar conclusións sobre posibles efectos desiguais na saúde.
Por exemplo, na mortalidade xeral e as enfermidades cardiometabólicas, aínda que algúns datos apuntaban que a cervexa e os licores podían ter un maior efecto negativo có viño, as diferenzas non foron estatisticamente significativas.
Respecto ao cancro, naqueles tipos cuxa evidencia causal co consumo total de alcol era totalmente consistente (orofarinxe, colorrectal e de mama, no caso de mulleres), as revisións tampouco mostraban un efecto diferenciado segundo os tipos de bebidas alcohólicas. En canto ás enfermidades neurodexenerativas, a información dispoñible tampouco permite establecer claras conclusións.
Referencia: Tipos de bebidas alcohólicas y efectos diferenciados en la salud: una revisión paraguas de estudios observacionales (Publicado en Revista Española de Salud Pública; consulta en PDF o estudo).
