Un monumento megalítico nunha das montañas máis altas de Galicia. Moi preto do cumio dos Tres Bispos, o colectivo Patrimonio dos Ancares vén de documentar o dolmen situado a maior altitude de Galicia, no concello de Cervantes, concretamente na Campa do Cibro, a 1.655 metros. Os achados foron comunicados a Patrimonio para que proceda á súa catalogación.
O achado trátase dun túmulo de terra de 16 metros de diámetro no que se poden observar cinco vigas de pedra que forman unha cámara poligonal de metro por metro e medio. Todo indica que a monumento megalítico foi saqueado en tempos remotos, un dato ao que tamén apunta o feito de que non se atope a laxe que debería cubrir a construción.
Patrimonio dos Ancares indica que, ata a data, a mámoa con dolmen a maior altitude de Galicia era a de Marco Cavado, a 1.640 metros entre os concellos ourensáns de Chandrexa de Queixa e Manzaneda. A mámoa sen dolmen a maior altitude continúa sendo a do Alto das Malladas, a 1.745 metros, no concello de Chandrexa de Queixa.
Doutra banda, na parroquia de Quindous, tamén no concello de Cervantes, no sitio coñecido como O Carballal, a 1.100 metros, o colectivo tamén documentou outra mámoa de 19 metros de diámetro e 1,70 de altura. Tamén neste caso o túmulo foi destruído e, ademais, cortado por un antigo camiño. Está preto da necrópole coñecida como Pena dos Mouros, formada por cinco mámoas.
