Unha investigación realizada por científicos da Escola Médica de Brighton e Sussex (BSMS) e o Instituto de Psiquiatría, Psicoloxía e Neurociencia do King’s College de Londres expón que a presenza natural de litio na auga da billa pode ter un efecto anti-suicidio. O estudo, publicado no British Journal of Psychiatry compilou investigacións desenvolvidas en varios países e atopou que as áreas xeográficas con concentracións relativamente altas deste elemento químico, usado no tratamento contra algunhas enfermidades mentais, correspondíanse con taxas de suicidio máis baixas.
“É prometedor que os niveis de litio detectados na auga poidan exercer un efecto anti-suicida e teñan o potencial de mellorar a saúde mental da comunidade”, expón Anjum Memon, catedrático de Epidemioloxía e Saúde Pública do BSMS e autor principal do estudo. Memon engade que “a prevalencia de problemas de saúde mental e as taxas de suicidio están a aumentar en moitos países; en todo o mundo, máis de 800.000 persoas morren por esta causa cada ano, sendo a principal causa de falecementos nas persoas de 15 a 24 anos“.
Os autores da investigación salientan que “é cada vez máis importante” ofrecer opcións para mellorar a saúde mental nas comunidades para “reducir a incidencia da ansiedade, a depresión e as posibles condutas suicidas”, que se viron agravadas, nalgúns casos, por mor da pandemia da Covid-19.
O litio lévase usando desde hai bastantes anos como un fármaco indicado no tratamento e prevención de episodios maníacos e depresivos, pois está demostrado que estabiliza o estado de ánimo e reduce o risco de suicidio en persoas con trastornos mentais. As súas propiedades tamén axudan a reducir a agresividade, os posibles comportamentos violentos e o abuso de determinadas substancias. Trátase dun elemento natural, presente en vexetais, cereais ou a propia auga da billa, xa que se pode incorporar a ela a través da erosión no subsolo, desde as augas subterráneas. Estudos recentes atoparon tamén que o litio se relaciona cunha menor incidencia do Alzheimer e outras demencias.
O profesor Allan Young, do King’s College de Londres, aclarou, neste sentido, que “os niveis de litio son moito máis baixos que os que aparecen nos medicamentos, aínda que a exposición neste caso é máis longa no tempo, desde os primeiros anos de vida.
Ensaios
Os achados poderían abrir a porta, segundo Anjum Memon, a comprobar a hipótese mediante ensaios aleatorios en distintas comunidades que poidan destacar polas altas taxas de doenzas mentais, comportamentos delitivos, abuso de substancias ou risco de suicidio. “Isto podería achegar máis evidencias para respaldar a hipótese de que o litio poida usarse en determinadas áreas para combatir ou reducir o risco destes problemas”.
No seu traballo, os investigadores realizaron unha revisión sistemática e unha metaanálise de estudos realizados en Austria, Grecia, Italia, Lituania, Reino Unido, Xapón e os Estados Unidos, que correlacionaron cos niveles de litio naturais nas muestras de agua potable e as taxas de suicidio en 1.286 regiones, condados e ciudades destes países.
Referencia: Association between naturally occurring lithium in drinking water and suicide rates: systematic review and meta-analysis of ecological studies. (Publicado en The British Journal of Psychiatry).