A evolución dos novos casos de Covid-19 arredor do planeta nos últimos días amosa sinais preocupantes. Despois de que a pandemia golpease con virulencia Europa e os Estados Unidos, as rexións de Latinoamérica, Oriente Medio ou Asia están experimentando un rápido crecemento de infeccións que as converten en nos principais focos de transmisión. “Esperamos que se alcancen os 10 millóns de casos totais na vindeira semana”, declarou este mércores o director xeral da Organización Mundial da Saúde (OMS), Tedros Adhanom.
“No primeiro mes do brote, reportáronse menos de 10.000 casos á OMS, e no último mes confirmáronse case catro millóns de casos”, expuxo a entidade nun comunicado. Países como Brasil (con case 40.000 positivos confirmados nun só día), India (case 16.000), México, Chile, Perú, Colombia, Pakistán, Arabia Saudí ou Bangladesh rexistran na actualidade múltiples brotes de transmisión comunitaria. Ata o momento, o continente africano mantense con taxas baixas de infección, agás Suráfrica, cun importante número de novos casos nos últimos días.
O crecemento que experimenta a pandemia en países con sistemas sanitarios máis febles está preocupando a OMS, que insistiu na súa mensaxe na “responsabilidade urxente de facer todo o que poidamos coas ferramentas que temos agora para suprimir a transmisión e salvar vidas“. Neste sentido, expuxo a necesidade de proporcionar osíxeno suplementario ás persoas con infeccións respiratorias severas ás persoas que o precisen.
“A OMS estima que coa taxa actual de arredor dun millón de casos novos por semana, o mundo precisa uns 620.000 metros cúbicos de osíxeno ao día, uns 88.000 cilindros grandes”, expón o comunicado. Neste sentido, advirten que “moitos países están experimentando dificultades para obter concentradores de osíxeno”, xa que “o 80% do mercado é propiedade dunhas poucas empresas, e a demanda actualmente supera a oferta”. Ante isto, a organización, da man da ONU, está a negociara compra de miles de concentradores que se enviarán a 120 países as vindeiras semanas.
