A onda epidémica da gripe alcanza en Galicia o seu máximo e suma un total de 724 ingresos hospitalarios, con 21 mortes, 11 delas provocadas directamente polo brote desta tempada.
O último informe de Vixilancia da Gripe en Galicia publicado polo Sergas, con datos da cuarta semana, ata o 26 de xaneiro, amosa que a epidemia do ciclo 2019/2020 chegou ao seu máximo, co que é previsible que a evolución da doenza comece a baixar nas videiras semanas.
Ademais, os pacientes que requiriron hospitalización pola enfermidade disparáronse un 60% e ascenden xa a 724 desde o inicio da tempada. Só no últimos sete días, sumáronse outros 270, a case un ritmo de 40 por xornada. Case 400 xa serían dados de alta, informa Sanidade.
O Sergas prevía hai unha semana alcanzar o pico da doenza nunha quincena de días. Por agora a tendencia do virus en Galicia segue sendo crecente e a difusión, xeral, nas catro provincias. A maioría dos virus que foron analizados deron resultados positivos para a gripe A, a da pandemia de 2009.
En canto á vacinación, mantense a tendencia de que teñan indicada a vacina, por idade ou por presentar factores de risco para unha gripe complicada, 580 dos ingresados, é dicir, oito de cada dez, e deles un total de 322 non estaban vacinados, o 55 por cento, informa a Xunta. No caso dos falecidos, dos 21 casos con gripe confirmada, 20 tiñan indicada a vacina e 13 non estaban vacinados.
En calquera caso, a actual tempada de gripe mantense nunha intensidade media, mentres que dúas áreas -Navarra e a Rioxa- chegaron a intensidade alta, segundo informa o Sistema de Vixilancia da Gripe en España.
