A dor de cabeza na Covid-19, un ‘bo’ síntoma?

Un estudo do hospital de Valladolid expón que as persoas que padecen cefalea ao contraer o coronavirus teñen un mellor prognóstico

O traballo atopou que arredor do 23% dos pacientes consultados manifestaron ter dor de cabeza durante a infección por coronavirus. Foto: Pixabay.
O traballo atopou que arredor do 23% dos pacientes consultados manifestaron ter dor de cabeza durante a infección por coronavirus. Foto: Pixabay.

Ademais da tose, a febre e a dor de gorxa, a dor de cabeza é un dos síntomas que aparecen con maior frecuencia entre as persoas que sofren a infección do coronavirus SARS-CoV-2. As distintas investigacións sitúan a frecuencia da cefalea entre un 10 e un 75% dos casos de Covid-19. Así, co obxectivo de precisar a prevalencia, determinar as características da dor de cabeza durante a infección e dilucidar as súas causas, un equipo de investigadores sanitarios da área de Valladolid realizou unha análise con case 2.200 pacientes de coronavirus.

Os síntomas neurolóxicos da Covid-19 son os máis frecuentes tras os pulmonares. Entre eles, a cefalea, xunto coa anosmia —a perda do olfacto e do gusto—, é a máis habitual. Ademais, “cando ocorren adoitan ser dos primeiros signos da enfermidade, polo que consideralos entre os posibles síntomas é fundamental”, lembra David García Azorín, neurólogo do Hospital Clínico Universitario de Valladolid e autor principal. O traballo publícase na revista Scientific Reports.

Con todo, a frecuencia rexistrada na literatura científica é pouco precisa, con cifras que varían enormemente.

“Isto pode relacionarse con que o lugar en que se realizan os estudos inflúe nos resultados. Por exemplo, se só se estudan pacientes que acoden a urxencias ou que necesitan ser hospitalizados, é de esperar que se trate de persoas nun estado máis grave. En segundo lugar, algúns estudos só inclúen pacientes avaliados por determinados especialistas e, por iso, a frecuencia dalgúns síntomas pode variar”, apunta o experto.

Así, unha das principais achegas deste traballo é que se avaliou de maneira consecutiva a todos e cada un dos pacientes que contraeron a infección nunha área representativa con máis de 260.000 habitantes.

O equipo revisou de maneira sistemática todos os diagnósticos, tanto en Atención Primaria como en Atención Hospitalaria e Urxencias. Un médico contactou con cada paciente e preguntou especificamente pola presenza de cefalea. E, en caso de estar presente, avaliou as súas características co obxectivo de entender mellor a frecuencia da dor de cabeza durante a infección.

Un 23% dos pacientes estudados presentou cefalea

Entre o 8 de marzo e o 11 de abril de 2020 diagnosticáronse 2.194 casos de Covid-19 entre os 261.431 habitantes da área de Saúde de Valladolid Este. O 23% reportou dor de cabeza, ao redor dun cuarto deles. Comparando a porcentaxe de pacientes que precisou ser hospitalizado e a porcentaxe que non, a diferenza “foi escasa” en relación á presenza deste síntoma, indica o autor.

Ademais, ao comparar entre sexos, o estudo tamén mostra que a dor de cabeza nas mulleres é máis intenso e vén acompañado con maior frecuencia de molestias fronte á luz – fotofobia–. Así mesmo, é máis común que elas teñan antecedentes médicos de dores de cabeza, o que se corresponde co observado na poboación xeral.

“Despois de analizalo moito, non podemos dicir que exista un patrón específico ou único da dor de cabeza durante a infección por coronavirus”, asegura o neurólogo. Con todo, a maioría dos pacientes describe “unha dor de cabeza de predominio a nivel frontal, bilateral, cunha calidade da dor opresiva –como tendo un peso encima da fronte–, de intensidade moderada a grave e frecuentemente acompañado de molestias #ante estímulos lumínicos ou auditivos”.

O investigador destaca que a maioría dos pacientes teñen outros síntomas de infección por coronavirus asociados, de forma que “non se debe confundir esta dor con outras dores comúns, como unha hemicrania ou unha cefalea tensional, xa que nun 25-50% dos pacientes esta dor ten características típicas de estas”.

Deste xeito, “catro de cada cinco persoas presenta cefalea no primeiros catro días da infección e en menos do 20% persiste máis aló de dúas semanas”, engade o investigador.
Un mellor prognóstico

Doutra banda, observaron que as persoas que reportan dor de cabeza adoitan ter un mellor prognóstico, con menor probabilidade de falecer como consecuencia da infección ou de desenvolver unha forma grave, ao presentar uns parámetros analíticos e unha resposta inmunitaria máis eficiente.

“Parece que a cefalea é un signo de que o sistema inmunitario pode estar a despregar as defensas fronte ao virus, sendo a cefalea un síntoma colateral desta loita”, subliña García Azorín.

Para estudar o papel da dor de cabeza na infección por Covid-19, o equipo está a rexistrar a duración da cefalea no tempo para establecer por que algúns pacientes seguen tendo dor meses despois da infección e estudar cales son os mellores tratamentos dispoñibles para mellorar a súa situación.


Referencia: Frequency and phenotype of headache in covid-19: a study of 2194 patients (Publicado en Scientific Reports).

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.