Os petróglifos da Laxe dos Bolos, en Caldas, con grabados “únicos” en Galicia

O cumio do monte Xiabre é unha das grandes atalaias para contemplar a ría de Arousa e a comarca de Caldas. Nunha das súas abas, que cae cara a parroquia de Saiar, en Caldas de Reis, sitúase a Laxe dos Bolos, unha estación na que xa se coñecía a presenza duns petróglifos, pero que está a tomar un novo pulo cunha investigación que desenvolve o Instituto de Ciencias do Patrimonio (Incipit-CSIC), nun traballo encargado polo Concello de Caldas de Reis. A semana pasada celebrouse na parroquia unha charla divulgativa a cargo de Elena Cabrejas, que dirixe as análises, e que destacou que a iconografía dos grabados convérteos en “únicos” en Galicia.

A actuación, que se comezou a deseñar en decembro de 2020, pretende determinar as claves que relacionan este petróglifo coas estacións rupestres de Monte Xiabre e a paisaxe natural e cultural circundante. O proxecto conta tamén coa colaboración da Comunidade de Montes Veciñais en Man Común de Saiar, propietaria dos terreos.

Publicidade

Detalle dos gravados da Laxe dos Bolos. Foto: CSIC.
Detalle dos gravados da Laxe dos Bolos. Foto: CSIC.

“A existencia do petróglifo Laxe dos Bolos deuse a coñecer no ano 2001 por Pena Santos e Rey García mediante a publicación dun calco do mesmo. A Xunta de Galicia promove, no ano 2007, un novo traballo no marco da Delimitación de Bens de Interese Cultural para un conxunto de petróglifos situados na provincia de Pontevedra, baixo a coordinación de Manuel Santos Estévez do Laboratorio de Patrimonio, Paleoambiente e Paisaxe, do IIT da Universidade de Santiago de Compostela, Unidade asociada por entón ao CSIC a través do Instituto de Estudos Galegos Padre Sarmiento”, explica Cabrejas.

Aquelas análises marcaron un camiño que agora continúa. “Polo momento, hai bastantes lagoas no coñecemento do petróglifo e sábese pouco acerca de cuestións como o seu paralelismo ou singularidade respecto a outros. Necesítase, por tanto, abordalo a través dun estudo interdisciplinar”, destaca a arqueóloga do CSIC. “O que estamos a facer é abordar a realización dun rexistro 3D fotogramétrico detallado e xeorreferenciado do soporte e dos gravados, un estudo estilístico dos motivos e unha contextualización cronolóxica co fin de comprender as implicacións culturais, singularidades e relacións con outros elementos da contorna do petróglifo”, explica Cabrejas.

O Incipit detalla, do mesmo xeito, que a análise pode ampliarse a áreas máis susceptibles de albergar outras entidades de semellante tipoloxía ou bens patrimoniais relacionados e non documentados ata o de agora. Alén disto, o proxecto tamén contempla desenvolver unha vertente divulgativa do proxecto, con unidades didácticas e exposicións que acheguen o valor patrimonial do enclave á veciñanza do municipio.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

O CSIC localiza na provincia da Coruña 180 posibles sitios arqueolóxicos

Grazas ás tarefas do Instituto de Ciencias do Patrimonio (INCIPIT), estes achados serán incluídos eventualmente no inventario arqueolóxico de Galicia

Descubertas novas pinturas prehistóricas en Carballeda de Valdeorras

O conxunto está formado por tres formas de soles e unha posible silueta humana e podería estar datado na Idade do Bronce

As pinturas rupestres máis antigas do mundo teñen 50.000 anos e atópanse en Indonesia

Un debuxo de figuras humanas que interactúan cun porco salvaxe foi descuberto na illa de Sulawesi

Novo sistema de escritura ou imitación? A insólita inscrición da pedra de Elviña

O arqueólogo Samuel Nión acaba de demostrar que o texto non está escrito en latín cursivo, como se pensaba ata o de agora