Un dos emblemas do Parque do Pasatempo de Betanzos sufriu un derrubamento esta mañá. Parte do templete central do Estanque do Retiro, que contiña a figura dun barco, caeu esta mañá durante os labores de baleirado da auga do recinto, dentro das obras de urxencia que o Concello de Betanzos aprobou no pleno no mes de setembro, segundo informou o propio consistorio. Ante este derrubamento, o Concello decidiu pechar a zona histórica para que os técnicos de Patrimonio Cultural da Xunta, á que xa se lle deu aviso, avalíen a situación e indiquen as medidas a tomar con carácter urxente.
Os 50.000 euros que se destinaron ás obras de urxencia investiranse agora na reparación do templete
Os traballos que se estaban realizando para frear o deterioro que vén sufrindo o parque tiñan previsto apontoar o templete, que xa contaba con graves problemas estruturais, visibles nalgunhas fendas. Segundo informou o Concello, xa se acometera o selado dalgunha greta na zona que hoxe se desprendeu, ademais doutras medidas de seguridade. O baleirado do estanque comezou este mércores, tal e como indicou o consistorio, para saber con exactitude o grao de afectación da fenda e proceder ao seu completo selado.
Advertencias anteriores
“Ao quitar a auga, a forza que fai contra o muro desaparece, e o muro cede”, explica o aparellador Jose Souto, da Asociación de Amigas do Parque do Pasatempo. O ano pasado, durante o episodio de seca, Souto lembra que “xa se viran fendas importantes, que medraban pouco a pouco”.
Esta mesma mañá, ao coñeceren a chegada de máquinas de bombeo, o propio Jose Souto chamou ao concello para advertir de que non realizaran o baleirado polo risco que supón, “pero ninguén me puido dar resposta”, lamenta.
Segundo sinalou o Concello betanceiro nunha nota de prensa, os 50.000 euros aprobados para as obras de urxencia “destinaranse agora os traballos que, segundo Patrimonio, haxa que realizar no templete”.