Un equipo de arqueólogos de Atapuerca atoparon o rostro dun homínido, cuxa especie está aínda por determinar, que viviu hai entre 1,2 e 1,4 millóns de anos, o máis antigo de Europa. Este feito abriría de novo as portas para descifrar o enigma da aparición da cara moderna e para comprender mellor a evolución do xénero humano fóra do continente africano. Os investigadores indicaron en Instagram que os restos parciais da cara, xunto a un dente do homínido, foron achados no cadro K29 do xacemento da Sima do Elefante (na serra de Atapuerca en Burgos) e o proceso de restauración do fósil foi realizado nos laboratorios da Residencia Gil de Siloé de Burgos.
Os xacementos atópanse a uns 15 kilómetros ao leste de Burgos. Como indica os investigadores na súa páxina web, comezaron a ter especial relevancia científica e social a partir do achado dos restos da Sima de los Huesos no ano 1992 e o achado, dous anos máis tarde, de restos humanos de máis de 900.000 anos de antigüidade e que definiron unha nova especie coñecida como Homo antecessor. No ano 2000, a UNESCO declarou os xacementos de Atapuerca como Patrimonio da Humanidade.
Ata o momento, nos xacementos da serra de Atapuerca, atopáronse restos fósiles e evidencias da presencia de ata cinco especies de homínidos diferentes: o Homo sp. (de fai 1.300.000 anos), Homo antecessor (de 850.000 anos), preneandertal (de 500.000 anos), Homo neanderthalensis (de 50.000 anos) e Homo sapiens. Deste modo, os novos achados do rostro do primeiro homínido europeo pasarían a ser un dos descubrimentos máis destacados dos últimos tempos.
Estes restos humanos foron hoxe presentados polos codirectores de Atapuerca, Juan Luis Arsuaga, José María Bermúdez de Castro e Eduald Carbonell; pola coordinadora do xacemento da Sima do Elefante, Rosa Huguet e por Gonzalo Santoja, conselleiro de Cultura de Castilla e León. Os expertos adiantaron que é posible seguir atopando novos restos desta especie en próximas escavacións na Sima do Elefante.
