Os investigadores de elite que contrate a Xunta a través do programa Oportunius someteranse cada cinco anos a unha avaliación. Será un comité de expertos nacionais ou internacionais o encargado de valorar a este persoal, tendo en conta os resultados das súas investigacións ou a súa produción científica, pero tamén a súa capacidade para conseguir financiamento para os seus proxectos, tanto pública como privada
Estas condicións están recollidas no borrador da nova orde que fixa os baremos para avaliar a actividade destes investigadores excelentes do programa de captación de talentos, segundo publica Faro de Vigo, que sinala que esa avaliación será crucial para determinar se se lles renova o contrato ou se perciben o complemento salarial de rendemento investigador. O financiamento para os proxectos poderá ser mediante contratos con empresas ou participando en convocatorias públicas de axudas estatais ou europeas.
O programa Oportunius é un plan que puxo en marcha a Xunta a finais de 2014 ante a fuga de investigadores brillantes ao estranxeiro. O seu obxectivo é “captar e reter o talento innovador” . Está dirixido a aqueles científicos que xa teñan acreditado o nivel de excelencia. Para iso deben estar en posesión dunha bolsa Grant do Consello Europeo de Investigación (ERC), ser investigadores novos (Starting Grants ou Consolidator Grants) ou sénior (Advanced Grants). En dous anos a Xunta fichou xa a cinco destes científicos e investiu un millón de euros, o que permitiu mobilizar fondos por outros 3,7 millóns. A súa intención, en todo caso, é conseguir captar a un total de 24 investigadores de recoñecido prestixio ata 2020.
