O profesor e biólogo Xacobo de Toro Cacharrón, un dos impulsores do proxecto de divulgación científica Xeoclip, foi elixido como Biólogo do Ano polo Colexio de Biólogos de Galicia (COBGA), que este xoves celebra a súa festa anual no Pazo de Adrán (Calo-Teo).
O recoñecemento recaeu en Xacobo de Toro “pola súa xa relevante contribución á innovación educativa en ciencias para a educación secundaria e bacharelato utilizando as novas tecnoloxías (video, realidade virtual, impresión 3D, YouTube…)”, segundo informou o COBGA nun comunicado. No acto seralle entregado un galardón, durante un encontro no que os membros da institución compartirán experiencias e se recoñecerá e agradecerá o esforzo aos colexiados que cumpren 25 anos na entidade.
Alén do premio de Biólogo do Ano, o COBGA entregará outros galardóns. A Empresa do Ano é a Cooperativa Agrogandeira Monte Cabalar, da que se valorou “a súa iniciativa de explotación silvopastoral comunitaria da terra para intervir sobre o abandono e o minifundio e significar unha oportunidade económica, ecolóxica e social”.
Pola súa parte, a Institución do Ano serán os Centros Oceanográficos de Vigo e A Coruña (pertencentes ao Instituto Español de Oceanografía) “en atención á súa dilatada e importante traxectoria no ámbito da investigación mariña especialmente nas áreas de pesquerías, da acuicultura e da protección ambiental do medio mariño”.
