Os menores de 21 anos farán seis millóns de desprazamentos gratuítos no autobús da Xunta neste 2023. Esa é a estimación da Consellería de Infraestruturas e Mobilidade da Xunta, que calcula que se rexistrará un millón máis de viaxes que durante o ano anterior. Así o declarou esta semana a titular do departamento, Ethel Vázquez, na presentación de Móvome, unha campaña para fomentar o uso do transporte público.
Segundo explicou a conselleira, arredor de 150.000 menores de 21 anos viaxan gratis no autobús da Xunta por toda Galicia, o que supón unha media mensual de aforro de 500.000 euros. Para beneficiarse desta medida, os mozos deben ter a Tarxeta Nova, a través da que a Xunta aplica directamente os incentivos económicos que, neste grupo de idade, lles permite viaxar gratuitamente. De todos modos, tamén hai a Tarxeta de Transporte Público de Galicia que aplica diferentes bonificacións para a poboación xeral.
Na presentación da campaña de fomento de transporte público Móvome, Ethel Vázquez asegurou que a Xunta destina case 100 millóns de euros ao ano para financiar o transporte público, o que resulta nun investimento de 300.000 euros ao día. Así mesmo, dende a Consellería de Infraestruturas e Mobilidade renováronse preto de 3.500 liñas de transporte interurbano. Vázquez enxalzou estas medidas poñendo en valor viaxar en autobús público, dado que é unha forma de reducir os niveis de contaminación e a dispersión da poboación e de enfrontarse ao encarecemento dos combustibles.
Finalmente, a conselleira subliñou que as medidas adoptadas dende o seu departamento contribuíron a que no primeiro semestre de 2023, as liñas de titularidade da Xunta rexistrasen 18 millóns de viaxes, un 17% máis que en 2022. Quedan por coñecer os resultados do segundo semestre pero, polo de pronto, no mes de xullo xa se acadou un 30% máis de viaxeiros que no mesmo mes de 2022. O obxectivo, a fin de contas, é o de incentivar o uso do autobús como alternativa a unha mobilidade máis segura, limpa e accesible.
O problema está en que moitas veces non fan a devolución dos cartos das viaxes e xa probei a ponerme en contacto coa conselleria pero non hai manera.Sabedes a manera de xestionar unha reclamación? UN SAUDO