Mergullados de cheo nun mundo dixital no que a sociedade está conectada case de xeito permanente a unha rede composta por toneladas de información de todos os tamaños e condicións, facilitarlle aos usuarios a busca de contidos é un dos obxectivos claves dos profesionais das Tecnoloxías da Información e a Comunicación. Neste eido traballa o Grupo de Tecnoloxías Multimedia, integrante da agrupación AtlantTIC, que vén de participar en Alemaña no concurso MediaEval 2015, unha iniciativa na que investigadores de todo o mundo achegan as últimas novidades sobre avaliación multimedia e recuperación de datos e na que os proxectos do equipo vigués, centrados na busca de datos a través de voz e imaxe, conseguiron unha cuarta posición, o mellor posto de entre todos os investigadores e investigadoras que participaban por primeira vez neste certame.
Xa sexa na contorna profesional ou no ámbito privado, atopar arquivos específicos sobre un tema concreto ou sobre un personaxe determinado pode ser unha tarefa laboriosa e a que se lle debe dedicar moito tempo si o que se desexa é atopar un resultado óptimo. Na actualidade a identificación dos arquivos a través dos tags (palabras que agrupan artigos relacionados e que definen máis detalladamente os contidos) limítase á identificación de etiquetas de cada arquivo, mais a partires de agora, grazas aos últimos resultados de investigación deste equipo vigués, será máis doado identificar un arquivo ou un personaxe tamén polos contidos que se integren dentro de cada ficheiro, especialmente os arquivos de voz e os audiovisuais.
Máis información no seguinte enlace:
Un equipo de AtlantTIC desenvolve algoritmos para buscar datos por voz e imaxe
