Santiago de Compostela acolle na noite desde martes unha nova edición do ciclo das NerdNites, un evento de divulgación científica no que colabora a USC e que ofrece charlas amenas sobre todo tipo de temas relacionados con diversos eidos da ciencia e a investigación. Ás 21 horas, no Riquela (rúa Preguntoiro, 35), abordaranse aspectos tan interesantes e diversos como o cambio climático, a personaxe de Tintín e a literatura do sur de Estados Unidos.
Pasarán polo micrófono, Pedro J. Rey Sanchiz, director da Oficina web da USC, que falará dos idiomas de Tintín, Susana Bayo, doutoranda do laboratorio Ephyslab da Universidade de Vigo, reflexionando sobre o impacto e a percepción que temos do cambio climático, e Leticia García Barreiro, doutoranda en Literatura norteamericana na USC, que explicará como se fala da relación entre amas e criadas na literatura sureña dos Estados Unidos.
