O próximo 9 de febreiro o proxecto europeo de innovación VINIoT celebrará na sede FEUGA de Santiago de Compostela (Campus Vida) o seu evento final de proxecto, tras 3 anos en activo, cunha feira aberta ao sector. O proxecto, financiado polo programa Interreg SUDOE (Programa de Cooperación Territorial do Espazo Suroeste Europeo), está centrado nun servizo de viticultura de precisión baseado en rede de sensores intelixentes para a transformación dixital de PEMES.
A principal innovación do servizo é a fusión das dúas principais tecnoloxías que se empregan na monitorización do viñedo: imaxes multiespectrais e sensorización do chan. Os principais resultados serán presentados pola coordinadora do proxecto, Rocío Pena, xunto con Tamara Rodríguez de FEUGA, Nicolas Saurin de INRAE (Instituto Nacional de Investigación sobre Agricultura, Alimentación e Medio Ambiente de Francia), e Julio Illade de AIMEN Centro Tecnolóxico.
Tras a presentación celebraranse dúas mesas redondas centradas na sustentabilidade do servizo VINIoT. A primeira contará con expertos procedentes das entidades Viña Costeira, Monet Vicultura e Paco&Lola para achegar o enfoque do sector vitícola rexional sobre o proxecto.
Os relatores da segunda mesa conversarán sobre a sustentabilidade dos resultados da investigación no marco da visión europea da agroalimentación intelixente coa presenza dos Centros Europeos de Innovación Dixital (EDIHs).
A organización convida os proxectos e iniciativas relacionadas coa viticultura de precisión a participar de maneira activa neste evento final, onde os interesados poderán promocionarse e expoñer materiais divulgativos.
