Un novo número da revista Mazarelos acaba de saír á luz. A publicación presentouse o sábado 28 de outubro nun acto celebrado na aldea de Meaus, no concello ourensán de Baltar, onde historicamente se situaba o Couto Mixto. É dicir, un microestado independente de Galicia e de Portugal durante centos de anos. Precisamente, o número 11 de Mazarelos céntrase na historia e etnografía do territorio, así como das súas reminiscencias do presente e as perspectivas do futuro.
Na presentación da revista participaron Serxio María Rodríguez Álvarez, politólogo e autor do artigo Os pastos mistos. O derradeiro vestixio do Couto Misto publicado na revista; José Rodríguez Cruz, etnógrafo do Couto e da Raia Seca e Miguel Rodríguez Martínez, historiador e editor de Mazarelos.
O politólogo e historiador comezou a presentación cunha contextualización histórica do Couto Mixto, dende as súas orixes ata as súas particularidades chegando ás reminiscencias actuais dos pastos mistos. Seguidamente José Rodríguez Cruz completou a proposta cunha serie de historias e lendas asociadas ao territorio, nas que participou o público asistente nutríndoas de achegas propias. Por último o editor de Mazarelos pechou o acto falando da revista e do papel da divulgación histórica na transmisión cultural en contextos locais do país.
Algunhas das valoracións presentadas no debate posterior foron a interpretación dende o presente do pasado do Couto Mixto, a súa realidade na veciñanza galega e portuguesa asistente ao acto, e as perspectivas de futuro.
