As vantaxes e inconvenientes da inmortalidade fan reflexionar ao home desde hai milleiros de anos. Co avance da ciencia e a mellora das condicións de vida nos últimos dous séculos, cada vez falamos máis sobre se algún día poderemos chegar a ser inmortais. Iso é bo ou é malo? “Debería a ciencia axudarnos a vivir para sempre?”. Esta é a premisa da vindeira edición da Regueifa de Ciencia, que se celebrará o martes 7 de novembro, ás 20 horas na Facultade de Comunicación da USC. A entrada será, coma sempre, libre e gratuíta.
Será a primeira regueifa na que participarán expertos internacionais. Por un lado da argumentación, a favor da tese da inmortalidade, estarán Carlos Martínez Alonso, expresidente do CSIC e experto internacional en inmunoloxía, e Aubrey de Grey, célebre xerontólogo británico. Pola outra banda, aportando argumentos contra o feito de vivir para sempre, debaterán Vicente Bellver Capella, profesor de Filosofía do Dereito da Universidade de Valencia experto en Bioética, e Richard Faragher, profesor de Bioxerontoloxía na Universidade de Brigton.
