Únete á nosa canle de Whatsapp
As estudantes da Facultade de Veterinaria do Campus Terra da USC Alba Nadal Grau, Mónica López Echevarría e Paula Rodríguez Villamayor acadaron o premio á mellor comunicación científica no X Congreso Nacional de Investigación para Alumnos pre graduados en Ciencias da Saúde, un certame desenvolvido do 21 ao 23 deste mes en Madrid e organizado pola Universidade Complutense.
A comunicación científica presentada polas alumnas da Facultade de Veterinaria de Lugo que resultou distinguida co primeiro premio neste congreso desenvólvese baixo o título ‘Estrés en coellos domésticos’ e foi realizada baixo a titoría da profesora do Departamento de Patoloxía Animal da USC Cristina Castillo.
A investigación das estudantes galegas versou sobre o coello como animal doméstico
O estudo recollido nesta comunicación trata sobre todos aqueles condicionantes capaces de promover situacións de estrés en coellos domésticos de distintas razas, unha especie que cada vez está adquirindo máis peso como mascotas ou animais de compañía. Sen embargo, o estudo incide en que a existencia de moitas as lagoas relativas ás súas necesidades sociais, nutricionais e medioambientais é un factor ou situación que predispón a estes animais ao padecemento de numerosas enfermidades.
O premio acadado polas estudantes da Facultade de Veterinaria da USC no X Congreso Nacional de Investigación para Alumnos pre graduados en Ciencias da Saúde, un foro orientado a iniciar aos participantes na investigación científica, ten, se cabe, máis relevancia pola elevada cifra de congresistas inscritos.
De feito, cómpre sinalar que participaron e presentaron traballos de investigación neste certame un total de 1.657 estudantes que están a cursar en distintas universidades españolas as titulacións de Farmacia, Medicina, Odontoloxía, Enfermaría, Fisioterapia e Podoloxía, Óptica e Optometría, Veterinaria, Ciencia e Tecnoloxía dos Alimentos, Logopedia, Terapia Ocupacional, Nutrición Humana e Dietética, Psicoloxía e Bioloxía.
