A Real Academia Galega de Ciencias (RAGC), xunto á Axencia Galega de Innovación (GAIN), abren hoxe a convocatoria a IV edición do Premio Galicia de Xornalismo Científico ao mellor traballo de difusión deste campo, co obxectivo de comunicar a ciencia á sociedade galega e facer partícipe á cidadanía dos avances e resultados das distintas ramas do sector científico.
A convocatoria contempla tódalas noticias, crónicas, ou reportaxes xa publicadas e emitidas entre o 1 de xullo de 2018 e o 31 de maio de 2019 por un medio de comunicación galego ou edición galega dun medio estatal, ben sexan dixitais, impresos, radiofónicos ou televisivos. Os artigos e as entrevistas están excluídos da convocatoria.
En canto á temática, pode ser calquera aspecto relacionado coa ciencia desenvolvida en Galicia: dende achádegos ata casos de éxito de transferencia de resultados ao mercado, pasando pola difusión do labor de grupos ou centros de investigación ata as posibles aplicacións dos seus resultados.
Proceso de presentación
Os e as xornalistas poden presentarse a título individual ou en equipo de xeito telemático, a través do seguinte documento, que está tamén dispoñible nas webs da RAGC e de GAIN, xunto ás bases da convocatoria que poden descargarse neste PDF.
Unha vez cuberto o formulario, debe remitirse ao correo pxornal@ragc.gal, xunto á documentación necesaria especificada no propio documento. O prazo para presentar os traballos finaliza o 31 de xullo ás 15.00 horas. A entrega do premio terá lugar o 8 de outubro, durante o acto no que se celebra o Día da Ciencia en Galicia.
