Martes 19 Marzo 2024

Roteiro, premio e debate: o programa de Pontevedra no Día da Muller e a Nena na Ciencia

O Concello presenta os actos do 11-F, cos obxectivos de visibilizar ás científicas, pór en valor o seu traballo e promover as vocacións das nenas

O Concello de Pontevedra celebra un ano máis en colaboración con GCiencia o Día Internacional da Muller e a Nena na Ciencia, que se conmemora o 11 de febreiro, cos obxectivos de reivindicar e visibilizar ás mulleres científicas, pór en valor o seu traballo e promover o interese das nenas pola ciencia e a investigación. O acto central será un encontro con divulgadoras científicas no Pazo da Cultura o propio día 11 que será presencial e retransmitido por streaming.

No evento participarán as investigadoras Carmela Cela, Paula Otero, Alba Aguión e Andrea Muras e no que a concelleira de cultura, Carme Fouces, será a anfitrioa. Tamén se convocarán un concurso escolar de relatos curtos, pensado para o alumnado de Secundaria, e un roteiro para público xeral sobre a pegada de mulleres científcas en Pontevedra. Con estas actividades preténdese facer do 11 de febreiro “unha data referente”, en palabras da concelleira de cultura, que presentou o programa este mércores.

Publicidade

Fouces tamén subliñou a necesidade de que as nenas se sintan capaces de adicarse á carreira científica e de que as mozas “reivindiquen as melloras laborais que hoxe as científicas non desfrutan”. O proxecto, que botou a andar no 2018, cumple este ano a súa quinta edición.

Encontro de divulgadoras científicas

O encontro con divulgadoras terá lugar o 11 de febreiro no Pazo da Cultura ás 12,00 horas e irá dirixido ao alumnado do 2º ciclo da ESO, Bacharelato e FP. O encontro estará centrado nas reflexións e intercambio de experiencias de catro científicas ao redor da divulgación da ciencia: as novas canles de comunicación (YouTube, Twitch, plataformas streaming…), o achegamento á xente nova, a fenda de xénero na ciencia e no eido da divulgación ou a promoción das vocacións científicas.

O encontro celebrarase no Pazo da Cultura e estará dirixido a alumnado da ESO, Bacharelato e FP

Unha das relatoras é Carmela Cela Rodríguez, graduada en Bioquímica e investigadora predoutoral no Centro de Bioloxía Molecular Severo Ochoa do CSIC, cunha canle de Youtube chamada Ciencia con Carmen e un programa de divulgación científica en galego en Twitch Ecos de Xigantes. Tamén participará Paula Otero Sánchez, graduada en Ciencias Biomédicas e  investigadora predoutoral no grupo Genomes and Disease do CiMUS, da USC, coa canle de Twitch Ciencia e tal xunto ao seu compañeio Iván Varela e un programa de entrevistas CiMUS Podcast.

Completan o programa do encontro Alba Aguión e Andrea Muras. Aguión é graduada en Bioloxía e investigadora do laboratorio Future Oceans Lab da Universidade de Vigo e gañadora do concurso de monólogos científicos Famelab España 2016, do concurso de vídeos de ciencia da Fundación Aquae 2017 e Somos Científicos 2017. Andrea Muras Mora, doutora en microbioloxía e investigadora pos-doutoral na Universidade Pública de Navarra, conta cun proxecto de divulgación científica que recibe o nome de Ciencia miúda, no que conta curiosidades a través das redes sociais.

O roteiro

Dirixido a un público xeral —recomendable maior de 12 anos—, o roteiro terá catro quendas os sábados 12, 19 e 26 de febreiro e 5 de marzo a partior das 11 da mañá. O percorrido porá en valor e visibilizará a unha ducia de mulleres científicas e investigadoras vencelladas á cidade de Pontevedra e reivindicará o papel de científicas galegas, mulleres que foron quen de abrirse paso en espazos ocupados tan só por homes ata que elas chegaron e que marcan un camiño pola igualdade que non ten volta atrás.

O roteiro irá dirixido ao público xeral e terá catro quendas os sábados 12, 19 e 26 de febreiro e o 5 de marzo

Entre as protagonistas do roteiro atoparemos tres premios Wonenburger: María Inmaculada Paz Andrade, referente internacional en Microcalorimetría, primeira catedrática da Facultade de Física da USC e primeira muller que recibiu a Medalla de Ouro da Real Academia Española de Física; Isabel Aguirre de Úrcola, arquitecta e paisaxista, que rediseñou ambientalmente a Illa das Esculturas e foi a primeira muller en recibir o Premio Nacional de Arquitectura Manuel de la Dehesa, en 1997; e Alicia Estévez Toranzo, microbióloga e investigadora referente en patoloxía e acuicultura e a segunda académica da Real Academia Galega das Ciencias.

Ademais, inclúe a outras mulleres que son parte da historia da cidade como María Alicia Crespí González, primeira catedrática dunha escola técnica superior en España; Elisa Patiño Meléndez, primeira muller en voar en Galicia e España e probablemente en Europa, e Concepción Arenal, a primeira muller visitadora de cárceres, en 1863 e a primeira premiada pola Real Academia de Ciencias Morais e Políticas.

Concurso de relatos curtos

O concurso A Muller e a Nena na Ciencia, mentres, vai dirixido ao alumnnado de secundaria —ESO e FP Básica—. O ditame do xurado darase a coñecer o 10 de febreiro e os premios son: Unha tablet Primux Siroco Y —para o primeiro premio— e altavoces Primux SK21 2.1 negros e un Powerbank Primux 2600MAH Portátil —para o segundo e terceiro premio, respectivamente—. A entrega de premios será o día 11 de febreiro, no marco do acto central do Día Internacional da Muller e a Nena na Ciencia.

As condicións do premio son:

  • O relato terá unha extensión mínima de 400 palabras e unha máxima de 500.
  • As narracións xirarán ao redor de temáticas inspiradas no 11F como: a relación das nenas coa ciencia, o traballo das nosas científicas e investigadoras e o seu rol como referentes, a importancia da divulgación científica ou como combater a fenda de xénero na ciencia.
  • O idioma empregado será o galego.
  • O prazo de presentación de traballos finaliza o xoves 27 de Xaneiro, ás 15.00 horas.
  • Os relatos terán que enviarse por correo, en formato pdf o word, ao enderezo electrónico gciencia@gmail.com , co asunto “Concurso relato curto A muller e nena na Ciencia”.
  • O xurado estará integrado pola concelleira de Cultura, Carme Fouces (ou persoa na que delegue); dúas investigadoras e divulgadoras científicas, Carmela Cela e Paula Otero; unha profesora da área de Ciencias e unha xornalista de Gciencia.
  • O xurado valorará a orixinalidade do relato, a capacidade expresiva do autor/a, a posta en valor das científicas e a pola igualdade na ciencia.

Consulta aquí as bases do concurso de relatos.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Grandes mulleres científicas que loitaron para romper o teito de cristal

https://theconversation.com/javascripts/lib/content_tracker_hook.js *Un artigo de Katalin Karikó é a flamante gañadora do último...

A UVigo adica febreiro a accións divulgativas polo Día da Muller e a Nena na Ciencia

O programa da Universidade de Vigo polo 11F inclúe obradoiros, feiras divulgativas, charlas e certames

Galicia superará os 40 graos durante a cuarta onda de calor da península

O sur de Pontevedra a Ourense serán as zonas máis afectadas durante un episodio de calor intenso que durará ata o xoves

Unhas xornadas afondan en como creatividade e innovación xeran un futuro máis sostible

Celebraranse este mércores 24 na Casa das Campás, en Pontevedra, ao abeiro do programa "Ciencia de ida e volta" impulsado pola UVigo