Coñecen o valor nutritivo das distintas froitas que consomen de maneira habitual ben por iniciativa propia ou a causa do programa Froita na escola, da Consellería do Medio Rural, no que participa o seu centro e que fomenta o consumo de froita fresca. E decidiron saber algo máis. Coa bata de científicos posta, alumnos e alumnas de 6º de Primaria do CEIP Froebel de Pontevedra apostaron por investigar e desenvolver o proxecto A produción de sementes nas froitas segundo a estación.
O seu traballo é un dos 18 realizados por escolares de Primaria de 10 centros educativos da cidade, ao abeiro da sección Ciencia no cole da IX Feira da Miniciencia-Pontenciencia 2022, que estará aberta ao público os días 27 e 28 de maio na Escola de Enxeñería Forestal de Pontevedra. A exposición conxúgase coa divulgación, polo que as autoras e autores das investigacións estarán ao dispor das persoas interesadas para explicar os seus proxectos polo miúdo.
O seu traballo é un dos 18 realizados por escolares de Primaria de 10 centros educativos da cidade de Pontevedra
Foi unha tarefa extensa e intensa na que participaron dúas aulas: 6º A e 6º B. Os seus estudantes —rapaces de 11 e 12 anos de idade— primeiro documentáronse sobre esta tipoloxía de alimentos e cuestións como que é unha semente, a súa estrutura, función, como se desprazan, o ciclo da vida… Logo escolleron as froitas obxecto de estudo e dividíronas en dous grupos: de verán e de inverno. Unha vez adquiridas as froitas no comercio local púxose en marcha o traballo de verificación da hipótese exposta: As froitas de verán teñen máis sementes que as de inverno.
No grupo de froitas de verán incluíron: framboesa, pexego, nectarina, papaia, uva, cereixa, albaricoque, mango, sandía e ameixa vermella. No de froitas de inverno: néspera, mazá, limón, pomelo, piña, aguacate, laranxa, mandarina, pera e selecta.
Con ollada analítica os escolares do CEIP Froebel abriron as froitas e contabilizaron as sementes, datos que tabularon co fin de extraer conclusións. Esta fase de experimentación completouse poñendo en contexto os resultados, que no deixaron ningunha dúbida sobre a veracidade da hipótese de partida xa que a media de sementes das froitas de verán triplican ás das froitas de inverno.
Están preparados para expoñer diante do xurado e o público interesado a súa investigación. Mais alén do galardón que poidan conquerir, hai algo que xa todas e todos gañaron: unha experiencia ben enriquecedora e, posiblemente, os primeiros pasos dunha vocación científica.
Pontenciencia 2022: Que o coñecemento non pare! está organizada polo Concello de Pontevedra en colaboración da Fundación Española para a Ciencia e a Tecnoloxía (Fecyt), ademais da Deputación de Pontevedra, a Universidade de Vigo e a FANPA Pontevedra.
