Un ano máis, o Centro Singular de Investigación en Química Biolóxica e Materiais Moleculares (CiQUS) convoca o seu programa de bolsas de verán dirixido a estudantes de grao con experiencia en Química ou estudos relacionados.
A terceira edición do CiQUS Summer Fellowships ofrece 15 bolsas para realizar prácticas formativas de iniciación á investigación da man de equipos científicos de excelencia e nunhas instalacións de primeiro nivel. As persoas seleccionadas recibirán 700 euros ao mes e terán cubertos os gastos de viaxe.
Durante catro a seis semanas aprenderán a utilizar modernos equipos e instrumentación sofisticada, traballando e vivindo nun ambiente estimulante de investigación na vangarda da química. Tamén poderán participar nas actividades científicas do CiQUS, que inclúen seminarios internos e o programa de conferencias impartido por figuras internacionais, e coñecer directamente a oferta formativa predoutoral do centro da USC.
Requisitos
Para solicitar unha bolsa deberase estar matriculado nun dos últimos anos dos seus estudos de grao e ter superado 140 créditos, cunha nota media igual ou superior a 8,0 puntos sobre 10. Deberase cubrir o formulario en liña e envialo por correo electrónico a ciqus@usc.es coa documentación solicitada sinalando no asunto da mensaxe ‘Summer17’. O prazo de solicitudes remata o 20 de abril.
