O Instituto de Investigacións Mariñas de Vigo acolle este venres unha nova sesión do ciclo de seminarios científicos que o CSIC organiza durante o primeiro semestre deste ano. A charla, a cargo do biólogo Miquel Planas, comeza ás 11 horas no salón de actos do IIM.
Baixo o título “El desafío del Hipocampo“, Planas, científico do CSIC, doutor en bioloxía pola USC e experto en acuicultura mariña, falará sobre os obxectivos e os resultados obtidos na investigación do proxecto Hippocampus, que o grupo de Bioloxía e Fisioloxía Larvaria de Peixes do IIM desenvolve desde 2006. Esta investigación é pioneira a nivel mundial e, entre outros avances, conseguiu pechar por vez primeira o ciclo de cultivo da especie Hippocampus guttulatus e desenvolver unha técnica exitosa de cría en cautividade.
As charlas continuarán o vindeiro 17 de febreiro, coa proxección do documental “Mareas rojas” e a celebración dun coloquio cos seus realizadores, Manuel García Blanco e Jorge Hernández, e proseguirán durante os meses de marzo, abril, maio e xuño. O resto de sesións pode consultarse na web do CSIC Galicia.
