A Delegación de Santiago do Colexio Oficial de Arquitectos de Galicia (COAG) organizou na súa sede da Praza da Quintana a conferencia “Restauración do Hospital dos Reis Católicos. Criterios e solucións técnicas”, impartida por Fernando Cobos Guerra, arquitecto responsable da redacción e dirección das intervencións realizadas no Hostal dos Reis Católicos, como as polémicas tubaxes das gárgolas do monumento.
Na actuación da fachada sur, que dá a Praza do Obradoiro, o maior problema viña derivado da humidade e o goteo da auga dende as gárgolas. Cobos explica que o equipo tratou de encauzar a auga da chuvia engadindo canos metálicos como a solución máis eficaz e viable posible, a de menor dano e a máis reversible. Tal e como explica, esta opción xa aparece en construcións antigas e é moi utilizada dende o século XIX, incluída na Catedral de Santiago. “Gil de Hontañón (arquitecto do Colexio de Fonseca e o claustro da Catedral de Santiago) xa propoñía 84 centímetros en 1561”, argumenta o experto.
O arquitecto-director destaca que “a gárgola é, fundamentalmente, un elemento arquitectónico funcional, máis ou menos decorado”. O impacto visual inicial débese á súa lonxitude que, segundo o arquitecto, se axustou por criterios de seguridade inicial. Cada tubaxe mide entre 80 e 90 centímetros a fin de salvar o voo do balcón e compensar o vento dominante que mete a auga na fachada.
As intervencións no hostal
As intervencións no Hostal dos Reis Católicos van dende a capela, o ciborio, os patios renacentistas e as fachadas co obxectivo de reparar os graves danos do edificio e recuperar os seus sistemas orixinais de evacuación das augas, cuxa deterioración é a responsable do seu lamentable estado, segundo explica Fernando Cobos.
O arquitecto indica que o seu plan está baseado “nun concienzudo traballo de investigación histórica e documental, ademais dun exhaustivo estudo profundo”. Engade, ademais, que detrás de cada intervención hai un equipo multidisciplinar integrado por arquitectos, historiadores, arqueólogos, restauradores, aparelladores e enxeñeiros, entre outros perfís profesionais.
Respecto á polémica das gárgolas, xustifica que recortar e alixeirar estas estruturas será doado cando en 2027 se restaure a cuberta completa. “Deixalas curtas agora provocaría con seguridade novos danos sobre a fachada recén restaurada”, apunta o profesional.
