O grupo liderado por María Mayán dende o Centro de Investigación en Nanomateriais e Biomedicina (Cinbio) da UVigo vén de recibir 100.000 euros a través da Fundación FERO para impulsar unha innovadora estratexia de inmunoterapia orientada a mellorar o tratamento do cancro de mama. A investigación farase mediante o perfeccionamento das terapias celulares CAR-NK, unha das aproximacións máis prometedoras da medicina personalizada actual
O proxecto desenvolverase desde o Cinbio en colaboración coa Unidade de Mama do Hospital Álvaro Cunqueiro, o Instituto de Investigación Sanitaria Galicia Sur (IIS Galicia Sur) e Sébastien Wälchli, investigador do Oslo University Hospital. O seu obxectivo é aumentar a capacidade das células NK modificadas xeneticamente para recoñecer e destruír de forma máis eficaz as células tumorais presentes nos tumores sólidos.
As terapias CAR-NK baséanse no emprego de células do sistema inmunitario deseñadas para localizar e atacar células cancerosas específicas. A diferenza doutras estratexias terapéuticas, ofrecen a posibilidade de actuar de maneira máis selectiva sobre o tumor e reducir os efectos adversos asociados aos tratamentos convencionais. A investigación liderada por Mayán centrarase en mellorar a capacidade destas células para penetrar no tecido tumoral e manter a súa actividade unha vez no interior do tumor, dous dos principais desafíos para a aplicación destas terapias en cancro de mama.
“A inmunoterapia está a transformar a forma de abordar numerosos tipos de cancro. Terapias celulares como as CAR-T xa demostraron unha grande eficacia en determinados tumores hematolóxicos, pero os tumores sólidos continúan presentando importantes retos. O noso obxectivo é desenvolver novas ferramentas que permitan trasladar estes avances a máis pacientes e aumentar a eficacia da resposta inmunitaria fronte ás células tumorais”, explica a investigadora.
Acelerar proxectos de alto impacto
A VIII Bolsa FERO en Cancro de Mama forma parte do programa de apoio á investigación promovido pola Fundación FERO para acelerar o desenvolvemento de proxectos innovadores en oncoloxía. A convocatoria busca favorecer a transferencia dos avances científicos á práctica clínica e contribuír ao desenvolvemento de novas opcións terapéuticas para as persoas afectadas por esta enfermidade.
Os investigadores galardoados desenvolven o seu traballo nos principais centros de investigación biomédica do país e abordarán algúns dos maiores desafíos actuais da oncoloxía, desde o desenvolvemento de novas inmunoterapias e terapias celulares de precisión ata a procura de tratamentos máis eficaces fronte ao cancro de páncreas, un dos tumores con peor prognóstico, ou a mellora da detección temperá da enfermidade.
Desde o Cinbio destacan que a concesión desta bolsa supón un importante recoñecemento á traxectoria científica de María Mayán e ao potencial dunha liña de investigación con claras perspectivas de transferencia clínica. Neste sentido, o director do centro, Miguel Correa, subliña: “Esta axuda pon en valor a calidade científica do traballo desenvolvido e reforza a aposta do Cinbio por impulsar investigacións capaces de xerar novas oportunidades terapéuticas para os pacientes”.
