Os científicos Pierre Agostini, Ferenc Krausz e Anne L’Huillier acaban de ser galardoados co Premio Nobel de Física polo deseño de novas ferramentas para estudar a dinámica dos electróns dentro dos átomos e das moléculas. Segundo anunciou esta mañá a Academia de Ciencias de Suecia, que fai entrega desta distinción, os tres científicos demostraron unha maneira de crear pulsos de luz extremadamente curtos que poden usarse para medir os rápidos procesos nos que os electróns se moven ou cambian de enerxía.
O ser humano percibe os acontecementos que se suceden a gran velocidade coma se fluísen uns dentro doutros, do mesmo xeito que unha película composta de imaxes fixas se percibe como un movemento continuo. Se queremos investigar acontecementos realmente breves, necesitamos unha tecnoloxía especial. No mundo dos electróns, os cambios prodúcense nunhas décimas de attosegundo, unha unidade de tempo que equivale á trillonésima parte dun segundo.
Os experimentos dos galardoados produciron pulsos de luz tan curtos que se miden en attosegundos, demostrando así que se poden utilizarse para proporcionar imaxes de procesos no interior de átomos e moléculas.
As súas contribucións
En 1987, Anne L’Huillier descubriu que ao transmitir luz láser infravermella a través dun gas nobre xurdían moitos sobretonos de luz diferentes. Cada sobretono é unha onda luminosa cun número determinado de ciclos por cada ciclo da luz láser. Débense á interacción da luz láser cos átomos do gas, que proporciona a algúns electróns unha enerxía extra que se emite en forma de luz. Anne L’Huillier seguiu explorando este fenómeno, sentando as bases para posteriores avances.
En 2001, Pierre Agostini conseguiu producir e investigar unha serie de pulsos de luz consecutivos, nos que cada pulso duraba só 250 attosegundos. Ao mesmo tempo, Ferenc Krausz traballaba con outro tipo de experimento, un que permitía illar un único pulso de luz que duraba 650 attosegundos.
Aplicacións potenciais
As contribucións dos galardoados permitiron investigar procesos tan rápidos que antes eran imposibles de seguir. “Agora podemos abrir a porta ao mundo dos electróns. A física dos attosegundos bríndanos a oportunidade de comprender mecanismos gobernados por electróns. O seguinte paso será utilizalos”, afirma Eva Olsson, Presidenta do Comité Nobel de Física.
Hai aplicacións potenciais en moitas áreas diferentes. En electrónica, por exemplo, é importante entender e controlar como se comportan os electróns nun material. Os pulsos de attosegundos tamén poden utilizarse para identificar distintas moléculas, como no diagnóstico médico.
