Té Areeiro. Esa é a nova marca da provincia de Pontevedra para impulsar a produción de té verde de camelia. Este resultado é froito da investigación levada a cabo pola Estación Fitopatolóxica Areeiro, vinculada á Deputación. O primeiro paso consistiu no rexistro da marca e a elaboración do Plan Estratéxico para impulsar a produción en toda a provincia e convertela nun referente baixo o paraugas de Areeiro, a fin de diferenciala e individualizala no mercado. “Máis pronto ca tarde seremos unha provincia cun té propio”, dixo a presidenta da institución provincial, Carmela, Silva, durante a presentación de Té Arreiro, celebrada esta mañá.
Areeiro ten unha área de 500 metros cadrados dedicada ao cultivo de té cun total de 300 plantas. Ademais, traballouse durante máis de 20 anos para seleccionar as plantas de camellia sinensis (variedade da que se obtén o té) ata elixir máis dunha ducia. Agora, unha vez creada a marca, toca traballar con centros de investigación, asociacións, persoas produtoras e responsables dos establecementos de restauración para fomentar este cultivo e a súa futura comercialización.
Foi a xefa de servizo de Areeiro, Carmen Salinero, quen deu a coñecer as liñas do Plan Estratéxico ,“que ten por obxectivo promover un modelo de produción sostible que contribúa a conservar e aumentar a biodiversidade e fomentar o emprego no rural”, tendo en conta que provincia reúne as condicións óptimas para esta planta, tanto a pequena escala coma en plantacións comerciais. Insistiu nas fortalezas que ofrece o proxecto, cunha bebida que é a segunda máis consumida do mundo despois da auga e cun consumo en crecemento, así como a alternativa que supón para o emprendemento este cultivo “de rápida produción, ecolóxica e que beneficia ao medio”. Citou que a camellia sinensis se atopa nas listas de plantas resistentes ao lume, polo que se pode usar como barreira protectora nas áreas próximas a poboacións rurais. Amais, o proceso de elaboración desde a colleita ata a comercialización é mecánico e físico, polo que non xera residuos de produtos químicos.
As accións enmarcadas no Plan Estratéxico abranguen a produción e difusión, “porque tan importante é como se elabora como como se consume” e, neste senso, anunciou a celebración de xornadas técnicas para explicar o método de cultivo e, unha vez que haxa persoas, colectivos ou centros que amosen o seu interese para cultivar, iniciaranse obradoiros formativos. “Faremos amais boletíns informativos sobre a produción e un seguimento das plantacións –engadiu-. Todo iso acompañado de catas de té e aproveitamento de celebración de datas sinaladas, como o Día do Té o 21 de maio, para organizar actividades de promoción”. Neste senso, a responsable de Areeiro incidiu tamén en que se potenciará a difusión nos centros educativos de restauración e tamén a sinatura de convenios con colectivos e asociacións para promocionar este cultivo. “Imos traballar de xeito transversal, para que chegue á persoa consumidora un té propio, novo e fresco, porque sabe á natureza. E hai que quitar a palabra amargo do té: o único té amargo é o mal feito”.
Pregunta: É o memo o te que consumimos que o de camelia?