O Ministerio de Ciencia e Innovación entrega esta tarde as súas Medallas ao Mérito na Investigación e a Educación Universitaria, un galardón que recoñece ás persoas e entidades que destacaron, de “modo eminente, no desenvolvemento e fomento da educación universitaria e da investigación científica e técnica”. Entre as galardoadas estará a catedrática de Farmacia e Tecnoloxía Farmacéutica da Universidade de Compostela, María José Alonso, que recibirá a Medalla de Prata xunto a Luis Enjuanes e Mariano Esteban, virólogos do Centro Nacional de Biotecnoloxía do CSIC que actualmente traballan no desenvolvemento dunha vacina fronte á infección do coronavirus SARS-CoV-2. Ademais, o Ministerio de Ciencia recoñecerá a título póstumo á bioquímica Margarita Salas e ao historiador Santos Juliá (nado en Ferrol en 1940), finados a finais de 2019.
A concesión do galardón anunciouse este luns no Boletín Oficial do Estado, a través dunha orde asinada polo ministro Pedro Duque, no que se valora a “prestixiosa traxectoria no ámbito da investigación científica, e en atención aos méritos e circunstancias de extraordinaria relevancia que concorren” no caso de Alonso, Enjuanes e Esteban. Este último comenzou precisamente a súa carreira na Universidade de Santiago de Compostela, onde se doutorou en Farmacia.
María José Alonso graduouse en Farmacia pola Universidade de Santiago de Compostela en 1981 e obtivo o seu doutoramento en 1985. É catedrática de Farmacia e Tecnoloxía Farmacéutica na USC e dirixe o MJ Alonso Lab. En 2014, xunto a Alicia Estévez, foi a primeira muller en ingresar na Real Academia Galega de Ciencias despois de case 25 anos. Ao longo da súa traxectoria acumulou infinidade de méritos e recoñecementos de prestixiosas sociedades.
Actualmente, ademais de participar en numerosos proxectos de investigación internacionais, o laboratorio que dirixe Alonso (unha das científicas máis citadas e recoñecidas de España) lidera desde Santiago de Compostela un proxecto de investigación para desenvolver e avaliar en estudos preclínicos unha posible vacina contra a Covid-19 baseada en ARN mensaxeiro. O método podería ser capaz de inducir respostas inmunitarias de longa duración fronte ao virus. O obxectivo da iniciativa é o de producir un vehículo sintético baseado en biomateriais inocuos e capaz de transportar o ARNm ao interior das células diana, de modo que logará a produción do antíxeno no organismo humano.
O grupo de María José Alonso buscará unha vacina contra a Covid-19
