O vicerreitor de Coordinación do campus de Lugo, Javier Bueno Lema, ofreceu este martes unha recepción institucional a dous representantes da universidade nipona de Kanazawa, unha das dúas institucións académicas de Xapón que están a participar nun proxecto Vía Láctea coordinado pola USC e que conta con financiamento da Unión Europea.
A visita ao campus de Lugo do profesor Seiichi Nakamura e da responsable do programa de mobilidade saínte na oficina internacional da Universidade de Kanazawa, Yuri Kutswada, encádrase nun proxecto Vía Láctea que promove accións de mobilidade de alumnado e profesorado ao longo de tres cursos académicos (2014-2017) para un total de 40 estudantes de grao e 20 profesores no ámbito da cultura e das Humanidades e das universidades de Minho (Portugal), kanazawa e Aichi Prefectural (Xapón) e a USC.
40 estudantes de grao e 20 profesores participan no proxecto Vía Láctea
A visita ao campus de Lugo do doutor en arqueoloxía da universidade de Kanazawa e membro do Centro de Estudos de Recursos Culturais do Instituto de Ciencias Sociais da referida universidade, Seiichi Nakamura, quen ofreceu dous relatorios na Facultade de Humanidades sobre a historia da civilización maya, centrados no estudo de Tikal e Copan como elementos representativos das dinastías clásicas mayas, e de Yuri Kutswada, forma parte dun itinerario de visitas que os levará esta semana á Universidade de Minho e aos campus da USC en Compostela.
Durante a súa estadía en Lugo, Seiichi Nakamura e Yuri Kutswada tiveron a ocasión de coincidir cos 8 estudantes xaponeses (4 alumnos da Universidade de Kanazawa e 4 estudantes de grao de Aichi Prefectual, que están a completar un programa de intercambio de dez semanas de duración na Facultade de Humanidades de Lugo. Os 8 alumnos da USC, entre os que se atopa unha estudante do grao en Ciencias da Cultura e Difusión Cultural no campus de Lugo, e da Universidade de Minho que participarán proximamente neste programa de mobilidade, completarán unha estadía en Xapón entre abril e agosto de 2016.
Os responsables académicos xaponeses da Universidade de kanazawa estiveron acompañados durante a recepción institucional ofrecida polo vicerreitor Javier Bueno da profesora da USC na Facultade de Humanidades JoDee Anderson e de Anne Forryan, do Servizo de Relacións Exteriores da USC.
