NOTA: Ademais dos seis investigadores mencionados, aparecen na lista Pablo Docampo e Álvaro Goyanes, que non foron incluídos na primeira información. Consulta máis detalles aquí.
Seis científicos baseados en universidades galegas, ou ben galegos que desenvolven a súa investigación noutras institucións, aparecen na listaxe Highly Cited Researchers 2020, unha clasificación realizada pola compañía Clarivate e difundido este mércores. Destaca a Universidade de Vigo, que coa inclusión de Jesús Simal, Francisco J. Barba, Seid Mahdi Jafari e Jianbo Xiao, coloca á institución no terceiro lugar en España, detrás de Granada e Barcelona, neste ránking de investigadores altamente citados. Os catro investigadores da UVigo traballan no eido da ciencia e tecnoloxía dos alimentos e aparecen incluídos no listado internacional no ámbito das Ciencias da Agricultura.
Alén disto, o catedrático de Análise Matemática na USC, Juan José Nieto Roig, inclúese tamén na listaxe. E o lucense Luis Liz-Marzán, experto en biomateriais do CIC biomaGUNE do País Vasco, sitúase tamén na clasificación. A listaxe, que este ano inclúe 6.167 investigadores e investigadoras de 60 países e rexións, identifica, tal e como indican os seus promotores, “aos investigadores que demostran unha influencia significativa no seu campo ou campos de investigación elixidos a través da publicación de múltiples artigos altamente citados durante a última década”. España ocupa neste 2020 o posto número 10 no ránking de países, con 103 investigadoras e investigadores.
No caso da UVigo, un dos seus investigadores, Jesús Simal Gándara, é catedrático da Área de Nutrición e Bromatoloxía da Universidade de Vigo dende 1999 e vinculado a esta institución dende 1991, subliña sobre a presenza acadada na listaxe este ano como “todo isto é froito dun traballo colectivo”, indicando como este tipo de resultados “axuda a mellorar a visibilidade da Universidade de Vigo no contexto da actividade científica mundial, especialmente no ámbito agroalimentario”.
Os outros tres nomes da UVigo correspóndense con científicos que se incorporarán proximamente á institución Francisco J. Barba vai ser nomeado investigador honorífico da Universidade, e colabora con Jesús Simal en diferentes liñas de investigación. Seid Mahdi Jafari, sumarase á institución como director científico dun laboratorio ibérico alimentario entre a Universidade de Vigo e o Politécnico de Bragança. E Jianbo Xiao é o candidato seleccionado na resolución provisional do programa de captación de talento HCR da UVigo 2020, cuxa convocatoria foi aprobada no Consello de Goberno celebrado o pasado mes de setembro.