Esta palabra entrou con forza nas nosas vidas no ano 2020: ‘coronavirus‘. Aínda que xa se clasificaban así algúns patóxenos como os que provocan o arrefriado común, non foi ata a aparición do SARS-Cov-2 cando se converteu nun fenómeno da fala mundial en todos os idiomas.
A Real Academia Galega incorporouno ao Dicionario neste 2020 coa seguinte definición: “Virus con forma exterior semellante a unha coroa, con ARN causante de infeccións respiratorias e dixestivas en persoas, en moitas especies de mamíferos e en aves”.
‘Dicionario da Ciencia’ é unha serie de audiovisuais producidos por GCiencia, e presentados pola actriz Déborah Vukusic, que afondan dun xeito desenfadado nas palabras relacionadas coas ciencias.
