Con moita probabilidade, a segunda onda pandemia da Covid-19 en Galicia superará antes da fin de semana a cifra de persoas falecidas na primeira (619). Despois de que novembro fose o segundo peor mes, tras abril, o presidente da Xunta de Galicia avanzou este mércores que a comunidade afrontará nas vindeiras semanas a segunda ‘desescalada’, ao constatar que as medidas tomadas hai arredor dun mes, co peche perimetral e da hostalaría, deron efecto na contención da crise. E o sector hostaleiro, que permanecía pechado en máis de 60 concellos desde hai un mes, poderá abrir a partir da medianoite do venres en toda Galicia, seguindo catro niveis de restricións en función da situación epidemiolóxica. As medidas entrarán en vigor na medianoite do venres.
O mapa da segunda desescalada de Galicia, concello a concello
Resumo das medidas
- Permítese a interacción social en persoas non conviventes de 4 a 6 persoas dependendo da situación epidemiolóxica en cada zona. Con todo, recoméndase limitar os encontros sociais á unidade de convivencia, sobre todo nos domicilios.
- Apertura da hostalaría nas zonas con menor incidencia.
- Restrición da mobilidade con Portugal durante a ponte, dada a alta incidencia no norte do país. A medida será solicitada á Delegación do Goberno español.
- Mantéñense os peches perimetrais nas zonas en nivel 3 (máximas restricións). Como referencia, entre outros criterios, establecerase unha incidencia acumulada de 100 casos/100.000 habitantes en 14 días para levantar esta medida.
- Mantense o confinamento nocturno de 23 a 6 horas.
En concreto, e tal e como avanza o Ministerio de Sanidad na súa estratexia, a segunda ‘desescalada’, a Xunta terá en conta indicadores como a incidencia nos últimos sete e 14 días, estes dous mesmos criterios para o caso das persoas de 65 ou máis anos, a positividade global das probas de diagnóstico en cada semana, a porcentaxe de casos con trazabilidade, a ocupación de camas de hospitalización e de coidados críticos por casos de Covid-19.
https://twitter.com/Xunta/status/1334119070111830016
“A tendencia da segunda quincena de outubro era moi preocupante“. Porén, a nova avaliación realizada este martes, “cunha tendencia sostida e constante á baixa” desde comezos de novembro, levou a reducir o nivel de restricións nalgunhas áreas. Así, as cidades de Santiago e Ourense, afectadas en primeiro termo por medidas máis estritas, situaranse xunto á meirande parte do territorio desde a medianoite do mércores en nivel 2.
Con todo, Alberto Núñez Feijoo destacou que “continúa a preocupación”, por mor da incidencia alta nalgunhas áreas, polo que a desescalada non avanzará de forma homoxénea en todo o territorio galego.
Situación actual
O número de novos casos amosa un importante descenso na última semana, situándose na contorna dos 300 diarios. Hai unha baixada no número das probas PCR realizadas, mais a positividade descende ata a contorna do 5%, no limiar superior dos criterios marcados pola OMS.
O indicador de casos activos segue descendendo, ao sumar nos últimos días máis altas ca novos casos:
Nos hospitais, a ocupación segue descendendo despois de acadar o cumio da segunda onda a mediados de novembro:
A cifra de persoas falecidas é de 1.221, ao notificar 10 novas mortes respecto á actualización anterior. Na segunda onda contabilízanse 602 falecementos fronte aos 619 da primeira.
