A escalada de medidas na contención da Covid-19, consoante ao rápido aumento de casos na meirande parte de Europa nos últimos días, podería estenderse a Galicia este venres. Tal e como se avanzou o martes, é posible que o comité clínico que asesora á Xunta de Galicia tome novas medidas nalgunhas áreas afectadas por unha maior incidencia de casos. Por agora mantense vixente a limitación de reunións a cinco persoas en todo o territorio, alén das maiores restricións nas comarcas de Verín, O Carballiño, Ourense ou Santiago, onde se prohíben as reunións de non conviventes, e os peches en varios concellos ourensáns.
Por outra banda, Os peches perimetrais de Asturias e Castilla y León e as limitacións establecidas en Portugal, deixan ao territorio galego nunha situación próxima ao peche na práctica, aínda que por agora a Xunta é un dos poucos gobernos autonómicos, xunto a Extremadura, Cataluña, Comunidade Valenciana, Baleares e Canarias, que non estableceu estas restricións.
Este xoves, a Consellería de Sanidade informou da detección de 618 novos casos confirmados por PCR entre as 18 horas do martes e o mércores, cando se pechou a última actualización dos datos. Vigo foi a área con máis casos novos (156), seguida da Coruña-Cee (123), Santiago-Barbanza (113), Ourense-Verín-O Barco (59), Ferrol (58), Pontevedra-Salnés (57), e Lugo-A Mariña-Monforte (52). Só na última semana confirmáronse máis de 4.000 novos casos.
Os casos activos soben ata os 7.930, ao descontar aos novos positivos as altas e os falecementos rexistrados respecto á anterior actualización. A área viguesa é tamén, desde o mércores, a que ten máis casos baixo seguimento. O aumento é xeral en todas as áreas desde o comezo da segunda quincena de outubro. En Ourense mantense o freo nos casos activos, aínda que a incidencia é igualmente alta despois dos importantes brotes detectados nas comarcas da capital, Verín e O Carballiño.
Segue incrementándose tamén a presión nos hospitais, con 67 persoas en unidades de coidados intensivos e outras 414 hospitalizadas. Segundo as cifras do mércores do Ministerio de Sanidad, 326 persoas tiveron que ingresar na última semana, 47 delas na UCI. A ocupación das camas por pacientes Covid-19 está arredor do 5,8% do total, e nas UCI sobe ao 10,2%, tamén segundo Sanidad.
Falecementos
O número de mortes elévase a 889, despois da confirmación do óbito de sete persoas respecto á actualización anterior. Na última semana rexistráronse 42 falecementos por mor da infección, e xa son 270 desde o comezo da segunda onda da pandemia, a partir de agosto.
Por concellos
O mapa de alertas que achega a Consellería de Sanidade amosa xa 41 municipios en nivel vermello. As sete cidades, cunha incidencia superior a 112 casos/100.000 habitantes, e 34 concellos, con máis de 21 casos, están neste nivel. 28 concellos están no nivel 2 (laranxa), con entre 14 e 21 casos, e outros 36 notificaron entre 7 e 14 casos. O resto dos concellos, 208, rexistraron menos de sete casos na última semana. Así está o mapa:
