Que factores poden influír na maior ou menor propagación do coronavirus SARS-CoV-2? A pandemia e as súas consecuencias están fomentando a colaboración de científicos de moi distintas disciplinas para ter resposta á diferente incidencia da Covid-19 nos distintos territorios. Ao estudo dos movementos dos cidadáns ou os casos non detectados súmase agora tamén a meteoroloxía. A Agencia Estatal de Meteorología (Aemet) e o Instituto de Salud Carlos III publican este martes un estudo preliminar no que apuntan que a menor temperatura media está relacionada cun aumento da incidencia do virus SARS-CoV-2.
O estudo, pendente de reforzar as súas conclusións a través da obtención de información máis precisa, expón a existencia dunha correlación negativa entre as cifras de temperatura media en cada comunidade autónoma e a taxa de incidencia acumulada en cada rexión do territorio estatal. Para obter estes resultados, e en consonancia co método seguido noutras investigacións internacionais, o equipo analizou o período entre o 26 de marzo e o 5 de abril.
O estudo apunta a que algunhas das comunidades afectadas, como La Rioja, Castilla y León, Castilla-La Mancha ou Navarra, rexistraron nestes días unha menor temperatura media. Galicia sitúase neste gráfico nunha zona media en canto a temperatura e incidencia.
En declaracións recollidas por El Confidencial, o portavoz da Aemet Francisco Belda engade a explicación de que Asturias e Cantabria, a pesar de ter unha temperatura baixa, algo menor cá de Galicia, tiveran unha incidencia baixa: “Naquelas comunidades pegadas ao mar, non só hai que ter en conta a temperatura, senón tamén a humidade absoluta, é dicir, a cantidade de auga que temos”.
Humidade e contaminación
Alén dos resultados preliminares do estudo, as dúas institucións tamén manifestan a intención de afondar na relación entre a propagación do SARS-CoV-2 e a humidade. Así, investigacións recentes indican que as altas temperaturas e a alta humidade poderían reducir significativamente a difusión do virus, “polo que a chegada da tempada primaveral no hemisferio Norte podería reducir efectivamente a transmisión da enfermidade”, expón a a Aemet. Tamén se analizará, por outra banda, como outro tipo de factores ambientais, como a contaminación atmosférica e en especial as concentracións de material particulado PM10, poden agravar a enfermidade.
Con todo, ambas institucións insisten en que se trata de investigacións preliminares, que deberían ser desenvolvidas con maior detalle e incluíndo máis variables, como unha análise máis próxima das temperaturas e os focos que máis contribuíron á propagación da enfermidade, así como os patróns de mobilidade da poboación.
Este estudo é o primeiro resultado dun acordo asinado pola Aemet e o ISCIII para colaborar na investigación dos factores que poden influír na propagación do virus. Segundo explica o web do ISCIII, “a sinatura do convenio persegue un estudo integral para analizar en profundidade e cuantificar a influencia de determinadas variables, así como da contaminación ambiental, na difusión do virus e a incidencia da enfermidade, co obxectivo final de desenvolver un sistema de vixilancia e contención epidemiolóxica a nivel estatal baseado na alerta temperá e na monitoraxe dos devanditos factores ambientais”.
O traballo conxunto estenderase tamén, para mellorar a precisión dos estudos, a outras variables en saúde, tales como ingresos hospitalarios, ingresos en UCI e mortalidade, mellorando a identificación de zonas de risco en tempo real a nivel provincial, deseñando estratexias de diagnóstico e prevención para a xestión de medidas de actuación adecuadas desde o ámbito da saúde pública.
